Deputeti i LDK-së, Avdullah Hoti, tha se vendin po e përcjellin tri probleme politike e ekonomike, derisa sipas tij, duhet menduar për një pako të re ekonomike. Ai potencoi para deputetëve se LDK-ja i ka tri propozime për dalje nga kriza.
“Ngritja e çmimeve. Të gjithë indikatorët tregojnë se jeta e shumë familjeve është vështirësuar. Ne vlerësojmë që është e pashmangshme pakoja për të ndihmuar sikur në kohën e pandemisë. Vonesat në këtë drejtim shtojnë barrën e familjeve. Ne kemi 3 propozime, masa e parë dhe e menjëhershme është të bëhet indeksimi i të gjitha skemave pensionale e sociale me inflacionin. Së paku për të mbuluar produktet bazike”, tha Hoti.
Sipas deputetit të LDK-së, zgjidhje e dytë është subvencionimi në bujqësi.
“Rritja e kostove të imputeve bujqësore shkon edhe qind për qind. Ftoj Qeverinë që të ketë rritje të menjëhershme të subvencionimit në bujqësi. E treta është t’i kthehemi debatit për pagën minimale. Duhet të behet indeksimi i pagave në sektorin publik, te gjitha këto masat janë të përballueshme për buxhetin e shtetit”, tha Hoti.
Deputeti i AAK-së, Ramush Haradinaj, deklaroi se muaji mars i rikthen gjithmonë kujtimet e kohës së luftës por edhe të krijimit të Ushtrisë Çlirimtare të Kosovës.
Ai deklaroi se veteranët e UÇK-së duhet të përfshihen në ligjin për Paga që të mos ofendohen.
Përball të gjithë atyre që iu mungojnë të dashurit e vetë, atëherë ata e meritojnë një lajm të mirë prej nesh. Ata nuk e kanë lajmin e mirë që t’u rriten pensionet, por ata nuk i pranojnë as diskutimet se kush është veteranë i vërtetë e kush jo. E dimë që ligji i Pagave është në proces por mos të harrojmë që të fillojmë nga kategoritë më meritore, ato të lirisë. Të paktën të përfshihen në këtë rritje e të mos i ofendojmë këta njerëz”, tha Haradinaj.
Në anën tjetër, deputetja e LDK-së, Rrezarta Krasniqi potencoi se janë shqetësuese shifrat e të rinjve që duan të largohen nga Kosova.
“Ngritja e çmimit të naftës, produkteve të tjera, janë bërë të padurueshme. E tani kur po debatojmë, janë qindra qytetarë që po presin para ambasadave që të ikin nga vendi, e zemërimi i qytetarëve është i madh me këtë Qeveri”.
