Agjencia Shtetërore e Arkivave të Kosovës (AShAK) ka bërë të ditur se ka përfunduar transferimi i materialit arkivor që mbahej ilegalisht nga strukturat paralele ilegale në komunat në veri të vendit.
Sipas njoftimit, materiali arkivor, i cili iu takon viteve 1944 deri në vitin 2000, është dorëzuar nga Policia e Kosovës dhe është deponuar në vend ruajtjet e AShAK-së.
AShAk po ashtu ka bërë të ditur se pranim-dorëzimi i këtij materiali është mbikëqyrur nga inspektorët dhe udhëheqësit e AShAK.
“Pranimi i sasisë së materialit arkivor nga komunat veriore në ASHAK, është një e arritur e jashtëzakonshme e gjithë rrjetit zyrtar arkivor në Republikën e Kosovës për shkak se tashmë kemi një progres të ndjeshëm në bashkimin e fondeve arkivore si detyrim i ruajtjes dhe administrimit efikas të kujtesës sonë kolektive, për çka ne e falënderojmë Policinë e Kosovës për mbështetje dhe asistim efikas gjatë procesit të transferimit të kësaj sasie të materialit në arkivin kompetent”, shkruhet mes tjerash në njoftim.
