Nënkryetari i komunës, Faruk Mujka, së bashku me drejtorin për Bujqësi dhe Zhvillim Rural, Ekrem Sadiku, dhe shefin e sektorit për Bujqësi, Bedri Bajrami, kanë vizituar kultivuesit e patates, Rexhep Pllana nga Kçiq i Madh, si dhe Behxhet Beqiri nga Bajgora.
Me këtë rast, përfaqësuesit komunal nga afër janë njoftuar me kultivimin e patates nga këta fermerë, ku z. Pllana ka të mbjellur rreth 10 hektarë patate dhe tani është në fazën e nxjerrjes së tyre, dhe patatet e prodhuara ai i eksporton për shitje në tregjet e Shqipërisë, dhe sipas tij deri më tani ka eksportuar 100 mijë kg. Ndërkaq z. Beqiri ka të mbjellur rreth 3 hektarë patate të cilat kryesisht i shet në tregun lokal për qytetarët mitrovicas.
Nënkryetari Mujka gjatë vizitës së realizuar ka potencuar se komuna vazhdimisht mbështet fermerët me subvencione nga Drejtoria për Bujqësi, dhe fermerët të cilët kultivojnë pataten janë ndihmuar me makineri bujqësore dhe sera, përkrahje këto të cilat do të vazhdojnë edhe në të ardhmen.
Vlen të theksohet se në këtë vit rendimenti kg/ ha ka qenë më i lartë në krahasim me vitin e kaluar, dhe sillet rreth 40,000 kg/ha në viset fushore, kurse në ato kodrinore rendimenti është më i ulët dhe mesatarja sillet rreth 20,000 kg/ha.
