74 policët e rinj, prej tyre 45 serbë që diplomuan ditë më parë, e kanë nisur punën të hënën.
Ata do të shërbejnë në katër komunat veriore, Mitrovicë e Veriut, Zubin Potok, Zveçan dhe Leposaviq.
Por, gjatë ditës së djeshme pati raportime se pjesëtarët serbë të Policisë së Kosovës, kanë marrë kërcënime nëpër grupe të rrjetit social rus, “Telegram”.
Një pjese të tyre u janë publikuar emrat, ndërsa është paralajmëruar se do t’u publikohen të dhënat personale të gjithëve.
Për këto kërcënime ka pasur reagime të shumta, nga ambasadori i ShBA-së në Prishtinë e ambasadorë tjerë të akredituar në vendin tonë.
“Kërcënimet dhe frikësimet e individëve që shërbejnë për të mirën e të gjithë qytetarëve në Kosovë janë komplet të papranueshme”, ka shkruar ai në Twitter.
“E kam thënë më parë, Policia e Kosovës eksiton për t’u shërbyer të gjitha komuniteteve në Kosovë dhe përbërja e saj duhet ta pasqyrojë diversitetin e Kosovës”.
Ndërkaq, edhe ambasadori i Britanisë së Madhe në Kosovë, Nicholas Abbott, e ka ndarë shqetësimin për këto zhvillime, duke thënë se “frikësimet dhe kërcënimet ndaj atyre që duan t’i shërbejnë vendit të tyre janë të papranueshme”.
Ai ka shpërndarë reagimin e Misionit Evropian për Sundim të Ligjit në Kosovë (EULEX), duke thënë se i ndan “plotësisht këto shqetësime”.
“Është e rëndësishme që Policia e Kosovës të pasqyrojë diversitetin e Kosovës dhe të jetë në gjendje t’u shërbejë të gjitha komuniteteve. Frikësimet dhe kërcënimet ndaj atyre që duan t’i shërbejnë vendit të tyre janë të papranueshme”, ka theksuar Abbott.
Ambasadori i Gjermanisë në Kosovë, Jorn Rohde, ka deklaruar se është shqetësuese që është duke u zhvilluar një fushatë frikësuese në rrjete sociale ndaj zyrtarëve të komuniteteve që e kanë filluar punën në Policinë e Kosovës në komunat veriore të vendit.
Ai, me anë të një cicërime në Twitter, ka bërë thirrje që kjo të ndalet menjëherë.
“Policët e rinj nga komuniteti boshnjak, rom, serb dhe turk i Kosovës meritojnë të gjithë mbështetjen, veçanërisht nga komunat dhe qytetarët ku janë të dislokuar”, ka thënë Rohde.
Veç tyre, ka reaguar edhe presidentja Vjosa Osmani.
“I dënoj kërcënimet ndaj zyrtarëve policorë të Kosovës nga ana e Serbisë dhe grupeve të saj kriminale”, nis postimi i Osmanit në Twitter.
“Policia jonë është profesionale dhe multietnike. Kjo fushatë duhet të ndalet dhe autorët duhet të sillen para drejtësisë. Jemi me oficerët tanë policorë derisa ata shërbejnë me guxim për një Kosovë të sigurt për të gjithë”.
Në anën tjetër shefi i OSBE-së, Michael Davenport, ka thënë se përpjekjet për të frikësuar apo kërcënuar oficerët e PK-së apo kadetët që fillojnë karrierën në polici duhet të dënohen pa rezerva.
“Të gjitha përpjekjet për të frikësuar apo kërcënuar oficerët e PK-së apo kadetët që fillojnë karrierën në polici duhet të dënohen pa rezerva. Ata që janë përgjegjës duhet t’i nënshtrohen me vendosmëri dhënies së llogarisë”, ka shkruar Davenport.
