Një objekt në Komunën e Zveçanit është duke u bastisur gjatë ditës së sotme nga ekipet e policisë.
Në të janë gjetur disa thasë me rërë. Policia është duke punuar për të verfikuar kohën se kur janë dërguar këta thasë me rërë në atë objekt të dyshimtë.
Kjo pasi që policia dyshimet e para i ka se të njëjtit thasë janë vendosur aty në mënyrë që të përdoren si llogore apo për bllokim të rrugëve.
Thasët sipas policisë dyshohet se janë përdorur edhe në barrikadat që ishin vendosur herën e fundit në fshatin Rudar e hyrje të Zveçanit.
Zv.drejtori i policisë në veri të vendit, Veton Elshani, konfirmoi për KALLXO.com bastisjen e cila po zhvillohet sot.
“Kemi pasur informacione dhe kemi pranuar sërish informacione se në një objekt mund të ketë thasë të mbushur me zallë që janë përdorur në të kaluarën si istikame (llogore) në barrikadat në Rudar te hyrja në Zveçan. Janë tërheqë këta thasë dhe kemi pasur informacion se të njëjtat mund të përdoreshin sërish. Bastisja ende nuk ka përfunduar”- tha Elshani për KALLXO.com.
