Drejtoresha e Gjimnazit “Frang Bardhi” në Mitrovicë, Zybejde Gogolli-Latifi nuk do ulet më në karrigen e drejtorit. Kjo pasi siç mëson ekskluzivisht “Mitropol” nga burimet e veta brenda Ministrisë së Arsimit, Shkencës, Teknologjisë dhe Inovacionit, e njejta do shkarkohet nga kjo pozitë për shkak se nuk ka bazë ligjore të jetë drejtoreshë.
Ky vendim u mor nga Këshilli i Pavarur Mbikqyrës për Ankesa dhe Parashtresa, këshill ky që është instanca më e lartë vendimmarrëse.
Burime të “Mitropol” njoftojnë se deri tek vendimi erdhi pas ankesës së Luan Mehmetit, drejtorit aktual të shkollës fillore “Migjeni”, i cili në konkursin e tri viteve më parë për drejtor në gjimnaz kishte aplikuar në të njejtën kohë me drejtoreshën Gogolli-Latifi.
Kërkesa e Mehmetit u vlerësua si legjitime nga KPMAP, tri vite pasi ushtroi ankesën, meqë Gogolli-Latifi nuk plotëson kriteriumet e kërkuara për emërim në pozitën e drejtorit.
Në kuadër të kualifikimeve të kërkuara për emërim në këtë pozitë ishin masteri në menaxhim, apo 360 orë trajnime të mbajtura në këtë fushë, kriter ky që nuk e kishte plotësuar drejtoresha e emëruar para 3 vitesh, meqë ajo kishte përfunduar vetëm një trajnim 3 ditor, dhe jo 360 orë siç kërkohej me ligj.
Vendimi siç mëson “Mitropol” u mor dy ditë më parë, por drejtoresha e Arsimit në Komunën e Mitrovicës, Drita Kadriu, nuk ka proceduar ende me vendimin, pasi ndodhet në pushim vjetor.
Numri i Kadriut ishte i paçasshëm kur u kontaktua nga “Mitropol”, gjersa për ekzekutim të vendimit ka afat prej dy javësh.
