Përdorimi i armëve të zjarrit është bërë një dukuri shqetësuese në vendin tonë.
Shumë shpesh Policia merr informacione se në qytete të ndryshme dëgjohen të shtëna me armë, duke u rrezikuar kështu jeta e qytetarëve.
Një rast i tillë ka ndodhur dje në pikë të dites në rrugën ‘Sadulla Avni Dibrani’ në Mitrovicë, ku u dëgjuan të shtëna me armë zjarri, të cilat u shkrepën nga një veturë në lëvizje, për çka u kërkua ndihmë edhe nga Policia.
Sinjali mëson se njësitet policore kanë dalë në vendin e ngjarjes ku kanë gjetur dhe sekuestruar tri gëzhoja që dyshohet se janë të armës që u përdor në rast.
Momentalisht nuk ka persona të dyshuar, por Policia ka ndërmarrë të gjitha veprimet e nevojshme hetimore për të zbardhuar rrethanat se si ka ndodhur rasti.
Me vendim të prokurorit rasti është iniciuar për veprën ‘Përdorim i armës apo mjetit të rrezikshëm’.
