17:12 – Bisilmi e Nagavci shkojnë në Luginë të Preshevës në ditën kur Bërnabiq vjen në Kosovë
Të hënën e 5 shtatorit Zëvendëskryeministri i parë i Kosovës që është përgjegjës për dialogun me Serbinë, Besnik Bislimi bashkë me ministren e arsimit, Arbërie Nagavci, pritet të vizitojnë Luginën e Preshevës.
Klan Kosova, ka mësuar se dyshja qeveritare do ketë një seri takimesh në Bujanoc dhe Preshevë, me Këshillin Kombëtar Shqiptar, pastaj deputetin shqiptar në Kuvendin e Serbisë, Shaip Kamberi e vizita në disa shkolla fillore të komunave në jug të Serbisë që banohen me shumicë nga shqiptarët.
Ndryshe për këtë vizitë akoma nuk ka konfirmim zyrtar se nëse Beogradi e ka dhënë pajtimin apo jo.
Nga zyra e zëvendëskryeministrit Bislimi, kanë thënë se së shpejti dalin me detaje.
Vizita e zyrtarëve të Kosovës në Luginë , mëtohet të zhvillohet në ditën kur në Kosovë, vjen për vizitë kryeministrja e Serbisë, Ana Bërnabiq.
16:47 – MPJ i jep leje Bërnabiqit për vizitë në Kosovë
Ministria e Punëve të Jashtme dhe Diasporës i ka dhënë leje për vizitë kryeministres serbe, Ana Bërnabiq, që ta vizitojë Kosovën këtë të hënë.
Kështu ka bërë të ditur për Klankosova.tv, zëdhënësja e MPJ-së, Qëndresë Fazliu.
“Ministria e Punëve të Jashtme dhe Diasporës në Qeverinë e Republikës së Kosovës, i është përgjigjur pozitivisht kërkesës së kryeministres së Serbisë, Ana Bërnabiq që ta vizitojë Kosovën me datën 5 shtator 2022”, është shprehur Fazliu, njofton Klankosova.tv.
Tutje, ajo tha se dhënia e lejes për vizitë bazohet në marrëveshjen lidhur me vizitat e ndërsjellta të përfaqësuesve politikë mes Kosovës dhe Serbisë.
Ndërkaq nga Zyra për Kosovën në Qeverinë e Serbisë bënë të ditur se vizita e kryeministres serbe është paralajmëruar të enjten, më 1 shtator, 72 orë para vizitës dhe, siç theksohet, në përputhje me Marrëveshjen për Vizitat zyrtare.
“Vizita e kryeministres së Qeverisë së Republikës së Serbisë, Ana Bërnabiq në Kosovë ka për qëllim të përcjellë mesazhe për ruajtjen e paqes dhe stabilitetit, në kuadër të të cilave është rruga e vetme për të arritur mbijetesën e serbëve në Kosovë”, thuhet në njoftimin e zyrës në fjalë.
13:17 – Ana Bërnabiq të hënën viziton Kosovën
Kryeministrja e Republikës së Serbisë, Ana Brnabiq, të hënën më 5 shtator do të vijë për vizitë njëditore në Kosovë.
Radiokontaktplus shkruan se me këtë rast ajo do ta vizitojë Mitrovicën Veriore, Zveçanin dhe Leposaviqin.
Së bashku me kryeministren serbe, Kosovën do ta vizitojnë edhe drejtori i të ashtuquajturës Zyre për Kosovë, Petar Petkoviq dhe drejtori i Zyrës për IT dhe e-Qeverisje, Dr. Mihailo Jovanoviq.
Raportohet se kryeministrja serbe do ta nisë vizitën e saj të hënën në mëngjes me Mitrovicë, ku do të vizitojë qendrën e parë multimediale në veri të Kosovës dhe Akademinë Shpirtërore.
Raportohet se kryeministrja serbe do ta nisë vizitën e saj të hënën në mëngjes me Mitrovicë, ku do të vizitojë qendrën e parë multimediale në veri të Kosovës dhe Akademinë Shpirtërore.
Pas kësaj është planifikuar një vizitë në manastirin e Banjskës në komunën e Zveçanit.
Në komunën e Leposaviqit, pasdite, Bërnabiq do të vizitojë familjen e vëllezërve Radosavljeviq, të cilët raportohet se janë zyrtarisht duke u zhvendosur në shtëpinë e re, të ndërtuar me mjete nga Qeveria e Republikës së Serbisë, përmes të ashtuquajturës Zyrë për Kosovën.
Kryeministrja e Serbisë vizitën e saj në komunën e Leposaviqit do ta përmbyllë me një xhiro në një fermë familjare.
Ndërkaq nga Zyra për Kosovën në Qeverinë e Serbisë bënë të ditur se vizita e kryeministres serbe është paralajmëruar të enjten, më 1 shtator, 72 orë para vizitës dhe, siç theksohet, në përputhje me Marrëveshjen për Vizitat zyrtare.
“Vizita e kryeministres së Qeverisë së Republikës së Serbisë, Ana Bërnabiq në Kosovë ka për qëllim të përcjellë mesazhe për ruajtjen e paqes dhe stabilitetit, në kuadër të të cilave është rruga e vetme për të arritur mbijetesën e serbëve në Kosovë”, thuhet në njoftimin e zyrës në fjalë.
Ndryshe, kjo është vizita e saj e parë në rolin e kryeministres së Serbisë.
