Bashkimi Evropian i ka shkelur rregullat e veta me procesin e liberalizimit të vizave për Kosovën, ka deklaruar të shtunën presidentja e Kosovës, Vjosa Osmani.
Osmani ka thënë se asnjëherë në historinë e BE-së nuk ka ndodhur si me rastin e Kosovës, kur Komisioni Evropian e rekomandon liberalizimin, ndërkaq, Këshilli i Evropës nuk e respekton atë rekomandim.
“Mungesa e liberalizimit të vizave nuk është vetëm gabim por një nga padrejtësitë më të mëdha të BE. BE-ja i ka shkelur vetë rregullat e veta sepse asnjëherë nuk ka pasur një rast në historinë e saj kur Komisioni Evropian rekomandon liberalizimin e vizave, kur ne është dashur të zbatojmë dyfishin e kritereve krahasuar me vendet e tjera të rajonit kurse Këshilli i Evropës nuk e respekton atë rekomandim”, ka thënë Osmani gjatë seminarit “Rose-Roth” të Asamblesë Parlamentare të NATO-s që po mbahet në Prishtinë.Ajo ka shtuar se tani Kosova është optimiste se liberalizimi do të ndodhë, mirëpo është po ashtu e kujdesshme sepse edhe në të kaluarën është thënë se gjërat janë të kryera, mirëpo nuk siç ka thënë, nuk janë kryer.
“Jemi optimist por shumë të kujdesshëm sepse edhe në të kaluarën na është thënë se gjërat janë të kryera por nuk është kryer. Pavarësisht sa i madh është dëshpërimi në BE ne asnjëherë nuk do të kthejmë kokën dika tjetër”, është shprehur Osmani.
