Do duhej që të ishte e hapur që nga 1 shtatori. Por, Institucioni Publik Parashkollor “Gëzimi Ynë” mbetet i mbyllur ende sot kur jemi futur në javën e dytë të tetorit.
Fajet për këtë s’i ka greva e SBAShK-ut. Fajtore për këtë është gjendja mizerje e Çerdhes Publike të qytetit e cila kishte filluar së renovuari muaj më parë pas marrëveshjes që kryetari i Komunës së Mitrovicës, Bedri Hamza kishte nënshkruar për projektin e Efiçencës së Energjisë.
Edhe pse ka muaj që punimet i ka marrë përsipër firma nga Prishtina “Alba Projekt”, ato po kryhen me ritëm shumë të ngadalshëm, meqë kompania në fjalë po angazhon hiç më shumë se nga tre-katër punëtorë në baza ditore.
Për më keq se kaq, kryetari Hamza kishte premtuar se do shtohet dinamika e punës në rregullimin e objektit në vizitën që i kishte bërë çerdhes bashkë me Arian Tahirin e Drita Kadriun qysh më 25 korrik. Kjo gjë le që nuk ndodhi, por siç mëson “Mitropol” nga burimet e veta firma nuk ka dhënë as afat se kur do kryhen punimet, duke u arsyetuar në zvarritjen e procedurave të prokurimit nga Komuna e Mitrovicës.
E kjo gjendje që po shkatërron si procesin mësimor ashtu edhe rrethinën e çerdhes ka filluar t’u pengojë shumë prindërve që detyrohen të punojnë dhe i kanë fëmijët në çerdhe.
Njëri nga ta në kushte anonimiteti i tha “Mitropol” se kishin shpresuar që me ardhjen e Hamzës në pushtet gjërat do ndryshonin për të mirë, por siç thotë ky prind, vendimi i Hamzës për çerdhen veç sa ua ka vështirësuar jetën edhe më shumë.
Në mungesë të një vendi për t’i lënë fëmijët, ata po detyrohen të paguajnë çerdhe private. “E ku me i lanë fëmijët o kryetar?”, u shpreh me mllef ky prind për “Mitropol”, gjersa pohoi se detyrohen të punojnë bashkë me gruan për ta mbajtur familjen dhe as paratë s’po i mjaftojnë pët çerdhe private tash pasi u mbyll ajo e shtetit.
Në gjendje të mjerueshme është edhe objekti dhe kopshti i çerdhes ku “Mitropol” ka realizuar disa fotografi për ilustrim.
