Pjesëtarë serb të Policisë së Kosovës, të cilët dhanë dorëheqje paraditen e sotme, janë parë duke vazhduar t’i përdorin veturat zyrtare të Policisë.
Në afërsi të rrugës që të dërgon për në Zveçan, rreth dhjetë persona të pauniformuar kanë qëndruar pranë një veture të Policisë.
RTV Dukagjini ka biseduar me këta persona, të cilët kanë konfirmuar se gjatë paradites kanë dhënë dorëheqje.
Ata nuk kanë treguar arsyen e përdorimit te veturës zyrtare.
Këta persona, pas disa minutave janë larguar nga lokacioni ku po qëndronin, për të lëvizur në pjesë të tjera të veriut të Kosovës.
Zyrtarët serb të Policisë dhanë dorëheqje mesditën e sotme, pas një vendimi të Listës Serbe.
Dorëheqje kanë dhënë edhe serbët e tjerë në institucionet qendrore, lokale, në gjyqësor e në institucione të tjera.
Gjatë ditës së shtunë të 5 nëntorit përfaqësuesit e Listës Serbe, në takimin me përfaqësuesit serbë të institucioneve të Kosovës, kanë vendosur për bojkotimin e institucioneve të Republikës së Kosovës.
Përveç zyrtarëve policorë, punonjësve të gjykatave dhe institucioneve të tjera, dorëheqje kanë dhënë edhe kryetarët e komunave veriore dhe Goran Rakiq, nga pozita e ministrit për Komunitete dhe Kthim në Qeverinë e Kosovës.i
