Një person nga fshati Nedakoc i komunës së Vushtrrisë ka përfunduar në spital mbrëmjen e kaluar, pasi u sulmua fizikisht nga dy persona të panjohur.
Burimet e kanë bërë të ditur se e gjithë ngjarja ka ndodhur rreth orës 21:10 kur në afërsi të shtëpisë së viktimës, dy persona të panjohur i kanë dalë në pritë dhe e kanë sulmuar fizikisht duke i shkaktuar lëndime të rënda trupore.
Ai u gjet i përgjakur nga bashkëshortja e tij e cila menjëherë e ka dërguar atë në Emergjencën e Spitalit të Vushtrrisë, por që aty u udhëzua që trajtimin mjekësor ta vazhdojë në Qendrën Klinike Universitare të Kosovës në Prishtinë.
Bashkëshortja e viktimës ka njoftuar edhe Policinë e Kosovës për atë që i ka ndodhur burrit të saj, të cilët menjëherë kanë dalë në vendin e ngjarjes për të kryer ekzaminimet e nevojshme.
Për shkak të gjendjes së rëndë shëndetësore, viktima nuk ka mundur që të përgjigjet në pyetjet e Policisë lidhur me rastin, por vetëm ka deklaruar se dikush e ka goditur me shkopinj në kokë.
Me vendim të prokurorit rasti do të hetohet si ‘Lëndim i rëndë trupor’.
