Kryetari Bahtiri takon drejtorët e shkollave të Komunës së Mitrovicës

Kryetari i komunës, Agim Bahtiri, i shoqëruar nga drejtori i Drejtorisë Komunale të Arsimit, Ismet Ferizi, zyrtarë komunal nga kjo drejtori, si dhe drejtori i Financave, Shukri Gashi, kanë mbajtur takim me drejtorë të shkollave të mesme të ulëta dhe të larta të Mitrovicës.

Në këtë takim është diskutuar lidhur me mbarëvajtjen e procesit edukativo-arsimor, situata me menaxhimin e pandemisë në shkolla, si dhe përmbyllja e obligimeve- pagesat për fundvitin fiskal.

Fillimisht drejtorët e shkollave kanë informuar me ecurinë e procesit mësimor gjatë periudhës së pandemisë dhe shprehen sfidat me të cilat po përballen.

Ndërsa kryetari Bahtiri, ka kërkuar nga të gjithë drejtorët që, në koordinim të plotë me personelin arsimor, të angazhohen maksimalisht që të vazhdojë në mënyrë të rregullt mbajtja e procesit mësimor, duke qenë të kujdesshëm dhe respektuar në mënyrë të plotë Manualin për mbrojtje nga virusi CoVid-19.

Në fjalën e tij drejtori i Arsimit, Ismet Ferizi, ka potencuar se është duke përcjellur me vëmendje të plotë situatën aktuale në shkollat e Mitrovicës dhe mbarëvajtjen e procesit mësimor, ku sa i përket gjendjes me pandeminë tha se fatmirësisht numri i mësimëdhënësve dhe nxënësve që kanë rezultuar pozitiv me virusin CoVid-19 gjatë kësaj periudhe ka qenë i vogël, dhe deri më tani nuk është mbyllur asnjë shkollë në Mitrovicë.