Ekipi i Njësisë Speciale të Policisë së Kosovës ka filluar të mblidhet në kampin ‘Blevedere’ në lagjen Bair të Mitrovicës së Jugut.
Autoblindat dhe automjetet e topave të ujin janë vendosur tashmë në këtë kamp.
Ekipi i KALLXO.com sjell pamje nga vendi i ngjarjes ku shihen automjetet e Njësisë Speciale të Policisë së Kosovës duke u mbledhur në këtë kamp.
KLIKO KËTU PËR TA SHIKUAR VIDEON
Kryetari i Listës Serbe, Goran Rakiq dhe katër kryetarëve të komunave me shumicë serbe në veri të Kosovës, kanë vendosur për bojkotimin e institucioneve të Kosovës.
Po ashtu, zyrtarë të shumtë të komunitetit serbë, që janë pjesë e Policisë së Kosovës, kanë dorëzuar mjetet e tyre të punës, duke njoftuar largimin nga Policia e Kosovës.
Policia e Kosovës ka njoftuar se në vazhdimësi po përcjellë zhvillimet e fundit në veri të Mitrovicës.
Policia ka thënë se sipas nevojës dhe vlerësimeve operacionale do të angazhojë personelin e saj, me qëllim të kryerjes së detyrave dhe autorizimeve ligjore, në funksion të garantimit të sigurisë së përgjithshme në vend si dhe ofrimin e sigurisë ndaj të gjithë qytetarëve pa dallime.
Kryeministri i Kosovës Albin Kurti ka reaguar në lidhje me situatën në veri të vendit, duke thënë se Beogradi ka nisur kërcënimet dhe përgatitjet për destabilizimin e Kosovës.
