Zyrtarët shtetërorë, duke përfshirë edhe pozita të larta të shtetit shpesh kanë qenë cak i kërcënimeve nga persona e grupe të ndryshme dhe për pasojë kanë kërkuar ndihmë e mbrojtje nga Policia.
Për një rast të tillë që ka ndodhur dje në Mitrovicë, Prokuroria ka nisur hetimet.
Burimet e Sinjalit brenda Prokurorisë kanë bërë me dije se një person ka shkuar në zyrën e Qendrës për Punë Sociale, ku ka kërcënuar një zyrtar dhe ka dëmtuar disa pajisje.
Më pas ai është larguar, për t’u kthyer sërish pas disa orësh. Por kësaj herë ai nuk shkoi duarthatë, pasi që me vete kishte marrë një shishe me benzinë, me ç’rast kishte rrezik të shkaktonte zjarr.
Njësitë policore kanë arritur që ta arrestojnë 32-vjeçarin dhe i njëjti është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Kanosje’.
