Një ngjarje e rëndë kriminale ka tronditur Mitrovicën të enjten mbrëma, ku një person është plagosur me armë zjarri në një sulm të dyshuar si vrasje në tentativë.
Incidenti ka ndodhur më 13 shkurt 2026, rreth orës 22:00, në rrugën e Ulqinit, në Mitrovicë.
Sipas informacioneve fillestare, viktima Burim Sadiku, rreth 43-vjeçar ka raportuar se derisa ishte duke kaluar rrugën, nga një veturë VW ngjyrë hiri, në lëvizje, një person i panjohur – shoferi i automjetit – ka shtënë me armë zjarri në drejtim të tij, duke e goditur.
Si pasojë, Sadiku ka pësuar lëndim në zonën mbi gjurin e këmbës së majtë, për ç’rast ka pranuar tretman mjekësor. Pas trajtimit, ai është liruar për në shtëpi.
Menjëherë pas sulmit, vetura e dyshuar është larguar me shpejtësi në drejtim të fshatit Koshtovë.
Në vendin e ngjarjes kanë dalë njësitë relevante policore dhe krimteknika, ku janë gjetur dhe sekuestruar dy gëzhoja të kalibrit 7.62 mm, të cilat do t’i nënshtrohen ekzaminimit forenzik.
Me rekomandim të Prokurorit kujdestar, rasti është iniciuar për veprat penale: “Vrasje në tentativë”, “Mbajtje në pronësi, kontroll apo posedim të paautorizuar të armëve”.
Autori i dyshuar mbetet ende në arrati, ndërsa hetimet janë në zhvillim intensiv për identifikimin dhe arrestimin e tij.
Burime nga hetimi bëjnë të ditur se po analizohen pamjet e kamerave të sigurisë në zonë, si dhe po mblidhen informacione shtesë për lëvizjen e automjetit të përfshirë.
Rasti mbetet nën hetime.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
