Vajzat dhe gratë po vazhdojnë të jenë viktimat më të shpeshta të dhunës, ngacmimeve e sulmeve seksuale. Për këtë fenomen shqetësues ditëve të fundit ka pasur reagime të shumta pas ngjarjes që tronditi vendin, dhunimit të 11-vjeçares në Prishtinë. Edhe pas kësaj ngjarje, është raportuar edhe për disa raste të tjera të ngacmimeve e sulmeve seksuale.
Burimet e Sinjalit kanë bërë me dije se një rast i tillë ka ndodhur edhe më 1 shtator në veri të Mitrovicës dhe si rezultat i denoncimit të një 21-vjeçareje, Prokuroria ka nisur hetimet.
Rasti dyshohet të ketë ndodhur në orët e mesditës, derisa vajza ishte rrugës duke ecur, kur për një moment, afër saj është ndalur një veturë, ku ndodhej i dyshuari që e kishte ngacmuar. Sipas informacioneve të para bëhet fjalë për një pasagjer që ndodhej në këtë veturë, i cili fillimisht e kishte ngacmuar me fjalë, e më pas i ka kërkuar seks oral, përmes gjesteve, me ç’rast ka ftuar edhe në veturë.
Pas pak minutave, të dyshuarit janë larguar nga vendi i ngjarjes, ndërkohë që vajza ka vendosur ta raportojë rastin në Polici, ku ka dhënë detaje se si u përballë me ngacmuesin.
Si rezultat i denoncimit, Policia është aktivizuar dhe ka ndaluar të dyshuarit, të cilët janë shoqëruar në stacion policor.
Ndaj të dyshuarit kryesor, Prokurori i Shtetit ka urdhëruar nisjen e hetimeve për veprën penale “Ngacmim seksual”.
