Deklaratën e kryeministrit Albin Kurti se nuk do ta shtyjë sërish afatin për ndërrimin e targave ilegale nga qytetarët e veriut njohësi i çështjeve të sigurisë Bedri Elezi po e cilëson si një deklarim për konsum politik.
Elezi i tha Ekonomisë Online se beson se pas presionit ndërkombëtarë Kurti përsëri do të marrë vendim edhe për dhënien e një afti shtesë. Sipas tij, Kurti nuk është i gatshëm të bëhet faktor për destabilizim rajonal.
Unë besoj fort se kryeministri e ka bërë një deklarim politik, këtë deklarim e ka bërë për konsum politik, ngase më vonë do të konsultohet me institucionet e sigurisë me partnerët ndërkombëtarë dhe në momentin kur kryeministri do ta kuptojë çështjen në fjalë, mirëfilli atëherë besoj që do të ndërrojë qëndrim dhe do të kemi një shtyrje të afatit, nuk ma merr mendja që Kurti është i gatshëm që ta marrë mbi vete faktorin e destabilizimit rajonal”, tha ai.
Elezi thotë se sipas informatave që posedon në veriun e Kosovës ka arritur një kontingjent i BIA-s serbe dhe i forcave të sigurisë ruse, të cilët po dëshirojnë të shfrytëzojnë vendimin e kryeministrit për mosshtyrjen e afatit dhe ta destabilizojnë gjendjen në Kosovë e rajon.
“Sipas informacioneve që kemi, ditëve të fundit në veriun e Kosovës ka arritur një kontingjent, bëhet fjalë për 2-3 ditët e fundit, i strukturave të sigurisë së Serbisë përkatësisht BIA serbe dhe shërbimi inteligjent ushtarak dhe po ashtu ka arritur edhe një numër i konsiderueshëm me këtë kontingjent të forcave të sigurisë ruse FSB-së, të cilët po dëshirojnë të shfrytëzojnë eventualisht vendimin e kryeministrit të Kosovës për mosshtyrjen e afatit.
Serbia po përgatitet që faktuarën e destabilizimit rajonal t’ia përcjellë Kosovës, duke shfrytëzuar këtë lloj kokëfortësie që kryeministri aktualisht po e paraqet. Faktori ndërkombëtar nuk do ta lejojnë që të cenohet siguria, e cila është ndërtuar për 20 vjet me radhë”, tha ai.
