Përfaqësues të bizneseve konsiderojnë se propozimi i ekzekutivit për pagën minimale është i pamjaftueshëm për të përballuar rritjen e çmimeve. Megjithëkëtë, ata nuk i mbështetin kërkesat e sindikatave që pragu i pagës të jetë 300, përkatësisht 400 euro. Oda Ekonomike ka propozuar pagë minimale prej 270 eurosh, e në Odën Amerikane thonë se rritja e paarsyeshme e saj mund të ndikojë në rritje të informalitetit
Rritja e pagës minimale në vlerën sa e ka propozuar Qeveria është kundërshtuar gjerësisht nga sindikatat.
Por, përfaqësues të bizneseve, ndonëse nuk i mbështetin kërkesat e sindikatave, konsiderojnë se propozimi i ekzekutivit është i pamjaftueshëm për të përballuar rritjen e çmimeve.
Në Odën Amerikane të Kosovës bëjnë thirrje që pavarësisht përcaktimit të nivelit të pagës, bizneset të shohin mundësitë e rritjes së saj edhe më tej.
“Kompanitë përtej rishikimit të nivelit minimal të pagesave, duhet të shohin edhe mundësitë e ngritjes së pagave për punonjësit e tjerë, pavarësisht nivelit të pagesave që mund t’i kenë pasur e që shkojnë përtej atyre të rregulluara me nivelin e pagesës minimale në vend”, ka thënë Arian Zeka, kryetar i Odës Ekonomike Amerikane në Kosovë.
Sipas kryetarit të Odës Amerikane, secila pagë në nivel të pagës minimale aktuale 135, përkatësisht 170 euro, nuk reflekton koston reale të shportës së konsumatorit.
Aktualisht, paga minimale për punëtorët nën 35 vjeç është 135 euro, kurse mbi këtë moshë 170 euro.
Qeveria e Kosovës ditë më parë, përmes ndryshimeve në disa ligje, i ka hapur rrugë rritjes së pagës minimale në 264 euro, për të dyja kategoritë.
Një vendim i tillë nga ekzekutivi është ndërmarrë, megjithëqë propozimi nuk ka dalë nga Këshilli Ekonomiko-Social.
Në Odën Ekonomike të Kosovës kritikuan këtë qasje, pasi thanë se Këshilli Ekonomiko-Social nuk duhej të anashkalohej.
“Sipas nenit 57 të Ligjit të Punës, Qeveria e Kosovës në fund të çdo viti kalendarik e përcakton pagën minimale sipas propozimit të Këshillit Ekonomiko-Social. Oda Ekonomike e Kosovës, si përfaqësuese e punëdhënësve, në mbledhjen e fundit të Këshillit Ekonomiko Social, e ka dhënë propozimin e saj që vlera e pagës minimale të jetë 270 euro, kurse partneret e tjerë kanë dalë me propozime të ndryshme. Në këtë mbledhje nuk ka pasur kuorum për votimin e lartësisë së pagës minimale nga ana e partnerëve socialë, andaj ka mbetur që të diskutohet në takimin e radhës së KES-it”, ka pohuar Lumnije Hashani nga Oda Ekonomike e Kosovës. “Ne si Odë Ekonomike e Kosovës mund të konkludojmë se nuk ka dalë asnjë propozim i unifikuar nga ana e partnerëve socialë (Këshilli Ekonomiko-Social) që i është drejtuar Qeverisë së Kosovës lidhur me përcaktimin e vlerës së pagës minimale”.
Sindikatat e sektorit publik e privat propozuan që paga minimale të jetë 300, respektivisht 400 euro.
Arian Zeka numëron pasojat që do t’i prodhonte një rritje e lartë e pagës minimale.
“Rritja e paarsyeshme e nivelit të pagës minimale mund të ndikojë në rritje të informalitetit, meqenëse pastaj kompanitë mund të gjejnë hapësirë të mos i deklarojnë një numër të punonjësve të tyre, ashtu që t’u shmangen pastaj detyrimeve të shtuara që mund të rëndojnë mbi to”, tha Zeka.
Lidhur me pagën aktuale minimale dhe respektimin e saj nga punëdhënësit, KOHA ka kërkuar disa informacione nga Inspektorati i Punës, por deri të dielën ato nuk janë ofruar.
