Gjashtë në dhjetë ndjekës të debatit të parë mes presidentit amerikan Donald Trump dhe kandidatit për president nga Partia Demokratike Joe Biden, thonë se ky i fundit e fitoi përballjen e para zgjedhjeve të 3 nëntorit, sipas një sondazhi të shikuesve në CNN.
Në intervistën me të njëjtit votues para se të mbahej debati, 56 për qind e njerëzve janë shprehur se presin që Bideni të bëjë punë më të mirë, derisa 43 për qind ishin pro Trumpit.
Rezultati i sondazhit pas debatit është i ngjashëm me atë të vitit 2016 kur Hillary Clinton, kandidatja demokrate për presidente, kishte mposhtur Trumpin 62 me 27 për qind.
Rreth dy e treta e përgjigjeve të Bidenit u panë më të sakta se të Trumpit dhe sulmet e tij ndaj presidentit u konsideruan shpesh të drejta. Në përgjithësi, 69 për qind e sulmeve të Bidenit u konsideruan të drejta, ndërsa vetëm 32 për qind të atyre të Trumpit u panë si të tilla.
Studimi është një lloj përfaqësimi i votuesve që kanë parë debatin e së martës, por nuk përfaqëson pikëpamjen e të gjithë amerikanëve.
Sondazhi i CNN-it u krye përmes telefonit dhe intervistave me 568 votues që shikuan debatin e 29 shtatorit. Rezultatet kanë margjinë gabimi prej 6.3 për qind. Respondentët u intervistuan nga data 22 deri 27 shtator.
