Disa ditë më parë u raportua një rast i dhunimit nga një 22-vjeçare në Mitrovicë, e cila denoncoi të dashurin e saj për dhunë fizike dhe seksuale.
I dyshuari është kapur nga Policia dhe brenda afatit ligjor është dërguar në paraburgim.
Është bërë e ditur se i dyshuari për kryerjen e veprës penale “Dhunim” dhe “Mbajtje në pronësi, posedim, kontroll apo posedim i paautorizuar i armëve”, është 26 vjeçari Ersan Peci, shkruan mitropo.
Lidhur me ngjarjen është rrëfyer vet viktima, e cila ka treguar se është dhunuar fizikisht e seksualisht për rreth 8 orë.
G.N tregoi se gjithçka kishte filluar kur ish i dashuri i saj e kishte detyruar të futet me dhunë në veturën e tij.
Maltretimi i saj kishte vazhduar në një motel, ku përveç dhunës fizike, ajo edhe është keqtrajtuar seksualisht madje është ofenduar e kërcënuar gjatë tërë kohës.
“Smë lejke me kajt as me bërtit e as me pi ujë”, u shpreh 21 vjeçarja.
Përveç këtyre ish i dashuri e kishte kërcënuar G.N se do t’ia vriste edhe babain.
“Ekstra prej Finlande kom ardh veç me ta vra babën”, i kishte thënë E.P viktimës.
Viktima tha se për një vit e gjysmë lidhje, ajo kishte përjetuar dhunë në mënyrë sistematike, por në këtë të fundit ajo ‘kishte parë vdekjen me sy’.
“Vet më ka thon qe po don me më myt e jo veç me më rreh”, shtoi tutje ajo.
Për lëndimet e marra ajo mori tretman mjekësor.
Policia e Kosovës konfirmoi se i dyshuari është arrestuar, ndërsa prokuroria dhe gjykata nuk janë përgjigjur në lidhje me veprimet e ndërmarra në lidhje me rastin.
