Sot rreth orës 09:00, policia ka pranuar informatën për një rast grabitje që ka ndodhur në rrugën “Nëna Terezë”, në Fushë Kosovë.
Menjëherë pas marrjes së këtij informacioni specialist për hetimin e krimit me një intensitet të shtuar kanë filluar ndërmarrjen e një varg veprimesh operative dhe hetimore, për të ndriçuar dhe sqaruar të gjitha rrethanat që kanë të bëjnë me rastin.
“Mbështetur në informatat e para të grupit hetimor që po zhvillon hetimet, dyshohet se vepra është kryer prej dy personave të dyshuar, të cilët pasi kanë grabitur një shumë të konsiderueshme parash, me shpejtësi me një veturë të dyshuar, janë larguar nga vendi i ngjarjes”, ka thënë për IndeksOnline, Flora Ahmeti, zyrtare për informim në Policinë Rajonale të Prishtinës.
Burimet e IndeksOnline kanë thënë se viktimë ishte një punëtor i ETC-së, i cili derisa po i dërgonte paratë e pazarit ditor në bankën Raiffaisen në Fushë Kosovë i janë grabitur ato.
Ende nuk dihet vlera e parave të grabitura ndërsa policia po merret me hetimin e rastit.
Aktualisht policia e mbështetur edhe nga prokurori i shtetit po punon me përkushtim për të identifikuar të dyshuarit e mundshëm, veturën me të cilën janë larguar si dhe vendndodhjen e tyre./IndeksOnline/
