Nesër në takimin në Bruksel mes palës kosovare dhe asaj serbe nuk do të diskutohet për Asociacionin, ka thënë kryeministri Avdullah Hoti, gjatë diskutimit në platformën e organizuar nga organizatat e shoqërisë civile.
Delegacionet e dy vendeve do të takohen nesër në Bruksel në nivel të ekspertëve.
“Nesër në Bruksel diskutohet për çështjen e obligimeve financiare. Të gjitha obligimet financiare në mes të dy shteteve, përfshirë reparacionet e luftës, pensionet. Nesër nuk diskutohet në Bruksel për Asociacionin, nesër nuk është një ditë e rrezikshme për Kosovën. Nuk jemi duke e hapur këtë marrëveshje, respektojmë një obligim kushtetues që e ka Kosova”, ka thënë Hoti, duke iu kundërpërgjigjur presidentit Hashim Thaçi, që tha se do të jetë me rrezik takimi i radhës në Bruksel.
Hoti: Serbia është pajtuar të hyjë në dialog që çon te njohja reciproke
Kryeministri i Kosovës, Avdullah Hoti, ka thënë se Serbia është pajtuar të hyjë në një proces të dialogut që do të çojë te njohja reciproke mes dy vendeve.
Ai ka thënë gjatë fjalimit në platformën e organizuar nga shoqëria civile.
“Serbia është pajtuar të hyjë në një proces të dialogut që çon tek njohja reciproke”, ka thënë Hoti.
Hoti ka refuzuar të flasë për deklaratat e presidentit Hashim Thaçi në lidhje me marrëveshjen për Asociacionin.
“Deklarimet që i bëjnë zyrtarët e ndryshëm nuk i komentoj”, ka thënë Hoti.
