Një punëtor i Kompanisë për Distribuimin e Energjisë Elektrike sot është kërcënuar derisa ishte në kryerje të detyrës në Vushtrri, raporton Gazeta Sinjali. Burimet nga Prokuroria kanë bërë të ditur se rasti është denoncuar paradite, me ç’rast viktima ka njoftuar Policinë se si u ballafaqua me një qytetar.
Ngjarja ka ndodhur në njërën nga rrugët e qytetit, kur i dyshuari R.H., pasi e kishte takuar punëtorin e KEDS-it, dyshohet se i është drejtuar atij me fjalët ”Ke me pas probleme me mua, mi ke djegë pajisjet elektrike pasi ma ke vendos njehsorin”.
Përballë kësaj situate, punëtori ka vendosur që ta raportojë rastin, duke kërkuar ndihmë nga Policia. Njësitë policore kanë nisur kërkimet për ta kapur të dyshuarin, por i njëjti ende nuk është gjetur.
Ndaj tij, me vendim të Prokurorit të Shtetit kanë nisur hetimet për veprën penale “kanosje”.
