Ndaj katër kryetarëve shqiptarë të zgjedhur legalisht në komunat veriore të banuara me shumicë serbe tashmë veçse është përmbushur faza e parë – në bazë të Udhëzuesit Administrativ – për inicimin e shkarkimit të tyre.
Elektorati lokal në ato komuna – rreth 20% e tyre – kanë vendosur firmat e tyre në peticionet e nisura nga grupet nismëtare ditëve të fundit.
Në Mitrovicë të Veriut ndaj Erden Atiqit u mblodhën fare shpejtë mbi 3 mijë e 600 nënshkrime sa kërkoheshin, njoftoi ditë më parë Sanja Krstiq për mediat serbe; numër ky që përbën rreth 20% të votuesve të regjistruar në atë komunë, përkatësisht 18 mijë e 199.
Edhe për Lulzim Hetemin në Leposaviq janë grumbulluar mbi 20% e nënshkruesve të peticionit, ka njoftuar dje për “Kosovo-Online” një nga nismëtarët me emër Veselin Radoviq. “Nga e hëna do t’i kemi të gjitha rezultatet e sakta dhe ta kryejmë peticionin”, ka thënë ai.
Në Leposaviq janë të regjistruar si votues rreth 13 mijë e 441 persona, çka i bie se në mënyrë që peticioni të jetë i suksesshëm duhet rreth 2 mijë e 700 persona të kenë nënshkruar, gjë që, sipas Radoviq, “është tejkaluar”.
Ndërkaq në Zubin Potok, Srxhan Vuçiniq, nismëtar i peticionit ka thënë dje për Kosovo-Online se janë mbledhur votat e nevojshme për shkarkim të Izmir Zeqirit; dhe se po shihet të tejkalohen 1 mijë e 300 nënshkrime sa janë të nevojshme që peticioni të kalojë suksesshëm.
Në rast se Komisioni Qendror i Zgjedhjeve (KQZ) konfirmon rezultatin e peticionit, kjo do t’i hapte rrugë shkarkimit të kryetarëve shqiptarë në komunat në veri që u zgjodhën në prill të vitit 2023, pasi zgjedhjet u bojkotuan nga serbët në shenjë pakënaqësie me politikat e Qeverisë së Kosovës.
Në mënyrë që peticioni të jetë i suksesshëm, kërkohet që të mblidhen të paktën 20 për qind e nënshkrimeve nga numri i përgjithshëm i votuesve të regjistruar.
Sipas KQZ-së, në Mitrovicën e Veriut duhet të mblidhen së paku 3.640 nënshkrime për shkarkimin e kryetarit të komunës, pasi në listën zgjedhore janë regjistruar 18.199 persona me të drejtë vote.
Në komunën e Leposaviqit të drejtë vote kanë 13.441 persona, që do të thotë se të paktën 2.689 prej tyre duhet ta nënshkruajnë peticionin për shkarkimin e kryetarit.
Javën e ardhshme, mbledhja e nënshkrimeve pritet të nisë edhe në Zveçan dhe Zubin Potok.
Në Zubin Potok peticionit duhet t’i përgjigjen së paku 1.347 votues, që është 20 për qind nga 6.732 të votuesve të regjistruar.
E në Zveçan, që peticioni të jetë i suksesshëm duhet të nënshkruhet nga së paku 1.411 persona.
Baza ligjore për largimin e kryetarëve të komunave
Sipas Udhëzimit Administrativ për shkarkimin e udhëheqësit të komunës, një grup qytetarësh, pas marrjes së autorizimit për të shfrytëzuar një zonë publike apo vend për të nisur një peticion, kanë 30 ditë kohë për të mbledhur nënshkrimet për shkarkimin e kryetarit. Ky afat mund të zgjatet vetëm një herë deri në 15 ditë.
Mirëpo, ministri i Administrimit të Pushtetit Lokal, Elbert Krasniqi, deklaroi javën e kaluar se qytetarët e Mitrovicës së Veriut, Leposaviqit dhe Zubin Potokut kanë afat për të mbledhur nënshkrime deri më 22 janar. Ai shtoi se afati për qytetarët e komunës së Zveçanit është më i gjatë për rreth pesë ditë, për shkak në KQZ është dorëzuar më vonë kërkesa për të ditur numrin e saktë të votuesve të regjistruar.
Nëse KQZ-ja konfirmon se nënshkrimet e mbledhura janë aq sa kërkohet dhe i verifikon ato, më pas organizohet votimi për shkarkimin e kryetarit, i cili duhet të mbahet brenda 45 ditësh. Që ky votim të jetë i suksesshëm, duhet 50 për qind, plus një votë e qytetarëve me të drejtë vote.
Pas kësaj, rezultati i dërgohet presidentes së Kosovës, Vjosa Osmani, e cila ka afat ligjor prej 30 deri në 45 ditë për të shpallur mbajtjen e zgjedhjeve të parakohshme.
Nisja e detyrës së kryetarëve shqiptarë në komunat në veri, nxiti tensione në fund të majit të kaluar, tensione që kulmuan në Zveçan, pasi protestuesit serbë u përleshën me pjesëtarët e misionit paqeruajtës të NATO-s në Kosovë, KFOR.
Bashkësia ndërkombëtare ka kërkuar uljen e tensioneve dhe shpalljen e zgjedhjeve të reja në katër komunat në veri të Kosovës.
