Rasti ka ndodhur në fshatin Jashanicë, Komuna e Leposaviqit. Siç ka njoftuar Policia e Kosovës përderisa zyrtarët policorë të kufirit kanë vërejtur një kamion i cili dyshohej për kontrabandim mallrash, gjatë tentimit për ta ndaluar të njëjtin, zyrtarët policorë janë penguar nga dy automjete civile.Ramiz Musliu, mërgimtari nga Mitrovica i ka marrë me veturën e tij, për t’i dërguar në jug.
“Unë kam ardhë me djalin dhe vajzën e djalit rreth orës 3:00 në Jarinjë dhe duke e marrë polisen e sigurimit janë afru dy zyrtarë policor me rroba civile por me jelek antiplumb dhe kanë kërku me i marrë deri në Mitrovicë, me arsyetimin se na është prishur vetura, por gjatë rrugës pastaj treguan se kanë qenë në rrezik nga kontrabandistët dhe gjatë gjithë kohës kanë qenë në gjendje gatishmërie për të shtënë me armë”, u shpreh Musliu.
Ai tutje rrëfen se në Leposaviq kishin hasur në një turmë të qytetarëve, por duke qenë se vetura e tij ishte me targa të huaja dhe kishte xhama të zi, nuk arriten të identifikojnë se brenda saj ka pjesëtarë të Policisë së Kosovës.
Lidhur me rastin gazeta ka kontaktuar edhe Policinë e Kosovës për të marrë një konfirmim, nëse janë ndihmuar nga mërgimtari Musliu, por të njëjtit nuk kanë kthyer ndonjë përgjigje.
Ndryshe, ky nuk ishte rasti i vetëm kur pjesëtarët e Policisë së Kosovës janë sulmuar në pjesën veriore të vendit.
