Një ditë të jashtëzakonshme, Laura Fazliu e përfundoi me sukses të madh. Xhudistja kosovare është nënkampione e Evropës.
Ajo të shtunën fitoi medaljen e argjendtë në kategorinë deri 63 kilogramë në Evropianin që po mbahet në Sofje të Bullgarisë. Laura ditën e nisi si bartësja vetëm e 15-të në Evropian, ndërsa e mbylli si nëkampione evropiane.
Është ky bindshëm suksesi më i madh i xhudistes 21-vjeçare, që kështu ka paralajmëruar arritje tjera kulmore. Në finalen e kategorisë deri 63 kilogramë, Laura u mposht nga britanikja Gemma Howell.
Howell 31-vjeçare ka përvojë dukshëm më të madhe që erdhi në shprehje në finale. Me të nisur lufta, Howell realizoi “Waza-ari”. Laura kërkoi hedhjet, por Howell përfitoi sërish. Realizoi tjetër aksion për “Waza-ari”, përkatësisht për ta fituar luftën.
Ishte një britanike tjetër që pritej ta kishte fjalën kryesore në kategori. Lucy Renshall ishte bartësja e parë dhe rivalja e dytë e Laurës, vajzës nga Mitrovica që xhudon e ka përsosur në Pejë, nën urdhërat e kryemjeshtrit Driton Kuka.
Pasi e kaloi me “Ippon” izraeliten Kerem Primo, Laura në luftën e dytë përballë e kishte Renshallin, të dytën në ranglistën botërore. Lufta ndaj saj ishte e fortë dhe zgjati shumë. Por Laura bëri hedhje të bukur për fitore me “Ippon”. Kështu hapi rrugën për suksesin e madh.
Në çerekfinale e kaloi çeken Renata Zachova, me hedhje për “Waza-ari”. Ndaj saj dominoi plotësisht. Dominante ishte edhe në gjysmëfinale ndaj spanjolles Cristina Cabana Perez. Edhe ndaj saj realizoi hedhje të bukur për “Ippon”.
Laura Fazliu ka pasur suksese të mëdha te kadetet e junioret, por për një kohë ishte në kërkim të suksesit te të rriturat. Trajneri Kuka pas Lojërave të Tokios i ka kushtuar më shumë vëmendje dhe rezultati erdhi të shtunën.
