Lista Serbe përmes një njoftimi në Facebook ka ftuar serbët e Kosovës që të protestojnë të hënën në ora 12:00 kundër ndalimit të dinarit pas hyrjes në fuqi të rregullores së amandamentuar të Bankës Qendore të Kosovës; por, duke ia mëveshur autorësinë e thirrjes së protestës një shoqate të pensionistëve serbë në veri.
“Lista Serbe përkrah protestën e paralajmëruar paqësore të qytetarëve në Mitrovicë (të Veriut) të paralajmëruar nga shoqata e bashkuar e pensionistëve, dhe në të njëjtën kohë ftojmë të gjithë qytetarët tanë nga Kosova që të hënën më 12 shkurt në ora 12 do të marrin pjesë në këtë protestë demokratike të qytetarëve dhe kundër vendimit të regjimit në Prishtinë për heqjen e qarkullimit të dinarit dhe pagesave, por edhe kundër lëvizjeve të njëanshme kundër interesave të popullit serb, që nga arrestimi i bashkëqytetarëve tanë të pafajshëm, militarizimi i veriut, deri te pushtimi brutal i forcave speciale të Kosovës në objektet e institucionit policor serb, nga organet e përkohshme deri te ambulanca, posta dhe objektet e organizatave joqeveritare”, ka shkruar Lista Serbe.
