Mbi 80 minatorë janë ngujuar në horizontin e 10-të të minierës Trepça në Stantërg.
Lajmin e ka konfirmuar për KosovaPress, Gani Osmani, kryetar i Sindikatës së Punëtorëve të Trepçës.
Ai ka thënë se ata janë të vendosur që të qëndrojnë aty deri sa t’i marrin pagat.
Atyre pritet t’i bashkohen nesër edhe punëtorët e ndërrimit tjetër.
“Punëtorët janë të vendosur që mos të dalin deri sa t’i marrin pagat, ndërsa këtyre pritet t’ju bashkëngjiten nesër edhe punëtorët e ndërrimit të parë”, ka thënë Osmani.
Qeveria e Kosovës ditë më parë, njoftoi se ka ndarë një buxhet prej 1 milion euro për kryerjen e pagesave ndaj minatorëve.
Lidhur me këtë ka reaguar edhe deputetja e PDK-së, Valdete Idrizi.
Ajo përmes një postimi në Facebook i ka ftuar institucionet të veprojnë shpejtë dhe të ofrojnë zgjidhje të qëndrueshme për ta.
“Shumë e dhimbshme t‘i shohësh minatorët të detyruar të protestojnë e të fillojnë grevën për pagat e tyre, të drejtën e tyre, që i fitojnë me mund e djersë, në kuptim të plotë të fjalës! Mos e harroni fuqinë e tyre! Për përmirësim të kushteve të punës, të masave anti covid për ta as që bëhet fjalë, ani pse e kanë obligim”, ka shkruar ajo.
