Tradita e kajakimit në Kosovë është edhe më e hershme se që kishim menduar. Kjo u konfirmua në takimin e fundit në mes të një delegacioni të FKKS-së dhe disa veteranëve të kajakimit në qytetin e Mitrovicës.
Në Klubin për Kajakim Trepça i cili ishte themeluar që në vitin 1948, kajakuesit ishin me kombësi shqiptare, serbe dhe të komuniteteve tjera. Ndër kajakuesit shqiptarë të gjeneratës së parë përmenden: Nazmi Jolla, Remzi Jolla, Selatin Gashi, Muharrem Sokoli, Basri Emra, Ismet Sadriu etj.
Ndërsa ata që spikatën me suksese në këtë sport pas viteve 70-ta dhe që konsiderihen si gjenerata e dytë e kajakusve të KpK Trepça janë: Skender Ramaxhiku, Mustafa Sokoli, Hysamedin Kadribekiqi, Rexhep Sokoli, Izet Sadriu, Skender Topallaj etj. Është për t’u theksuar se në vitin 1970, Skender Ramaxhiku kishte fituar titullin kampion republikan në kategorinë për junior në disiplinën Sllallom.
Me këtë traditë dhjetra vjeçare, Kosova lirisht mund të renditet në grupin e shteteve të para që kanë zhvilluar kajakimin në këtë pjesë të Evropës.
