Presidentja e Kosovës, Vjosa Osmani, ka thënë se është tronditës akti çnjerëzor i dhunimit seksual të të miturës 11 vjeçe.Prandaj, sipas saj, kryesit e këtyre veprave duhet të marrin përgjigjen e duhur dhe të menjëhershme nga organet e drejtësisë.
“Ne nuk duhet të lejojmë që vendi ynë të jetë i pasigurt për vajza e gra”, ka shkruar ajo tutje.Ajo ka thënë se për vite me radhë në raste të caktuara është parë mostrajtimi i barabartë i jetës së grave dhe të burrave, fajësimin e viktimës e jo të dhunuesit e deri të rastet me dënime edhe më të ulëta se sa ato që parashihen me ligj.
“E kjo, vetëm sa i ka inkurajuar keqbërësit e dhunuesit. Prandaj, kërkoj nga organet e drejtësisë që ta eliminojnë në tërësi seksizmin dhe pabarazinë në vendimet gjyqësore si dhe nga institucionet e sigurisë që të rrisin nivelin e mbrojtjes për vajzat e gratë që janë viktima të dhunës. Është koha po ashtu, që të procedojmë me ndryshime legjislative që ashpërsojnë edhe më tej dënimet ndaj dhunuesve”, ka thënë ajo.
Sipas saj, është përgjegjësi kolektive të kujdesemi që të gjithë fëmijëve t’u garantojmë fëmijëri të dinjitetshme dhe të eliminojmë dhunën mbi baza gjinore.
Rasti i dhunimit të të miturës ka ndodhuri të shtunën mbrëma në Prishtinë dhe sipas dyshimeve, bëhet fjalë për pesë persona, mes tyre edhe një i mitur.Ajo ka shkruar në Facebook se kërkon një hetim rigoroz dhe përgjegjësi para ligjit për kryesit e veprës.
“Me ashpërsinë dhe vendosmërinë më të madhe duhet ta përsërisim njëzëri se askush s’është mbi ligjin. Ligji duhet të jetë i ashpër me secilin keqbërës të tillë, e posaçërisht në rastet sikur ky kur cak i dhunimit janë fëmijët”, ka shkruar ajo.
Sipas saj, dhunimi seksual sikurse edhe të gjitha format e dhunës ndaj vajzave e grave përbëjnë kërcënim për të gjithë dhe shpërfaqin një plagë serioze në shoqëri.
