Presidentja Vjosa Osmani, tha se synim i politikës së jashtme mbeten anëtarësimi në BE dhe NATO.
E para e shtetit në hapjen e edicionit të nëntë të Shkollës Pranverore Diplomatike, organizuara nga Akademia Diplomatike, shtoi se qëllimet e Kosovës janë të qarta sa i përket anëtarësimit në institucioneve të rëndësishme ndërkombëtare.
Prandaj sipas saj, është i rëndësishëm bashkëpunimi në të gjitha fushat për të pasur paqe e siguri në rajon e më gjerë, duke iu referuar edhe dialogut me Serbinë.
Osmani ka thënë se diplomacia ekonomike ka një rol shumë të rëndësishëm në zhvillimin e vendit, ndonëse ka pohuar se Kosova si vend i vogël ka më shumë sfida.
“Anëtarësimin në organizatat ndërkombëtare në BE dhe NATO mbeten synime tona të përbashkëta. Zgjidhja në dialogun me Serbinë, është sigurimi për paqe në rajon dhe më gjerë. Diplomacia ekonomike mbetet prioritet. Vendet e vogla si Kosova e kanë më të vështirë, prandaj është shumë i rëndësishëm partneriteti sidomos në diplomacinë ekonomike”, ka thënë ajo.
Zëvendësdrejtori i Akademisë Diplomatike të Kosovës, ambasadori Beqir Ismaili, tha se diplomatët e rinj përveç tjerash duhet që të jenë përgatitur edhe në aspektin ekonomik.
