Një zjarr i përmasave të mëdha ka përfshirë një shtëpi në fshatin Vaganicë të Mitrovicës së Jugut, duke shkaktuar dëme të konsiderueshme materiale.
Bëhet e ditur se ngjarja ka ndodhur mbrëmjen e së mërkures, ndërsa pronari i shtëpisë ndodhet përkohësisht jashtë vendit.
Sipas kallëzimit të N. T., rreth 47-vjeçar, shtëpia e djalit të axhës së tij është përfshirë nga flakët në rrethana ende të pasqaruara.
Në vendin e ngjarjes kanë dalë njësitet policore dhe zjarrfikësit, të cilët kanë arritur ta lokalizojnë zjarrin, duke parandaluar përhapjen e mëtejshme të flakëve.
Sipas konstatimeve fillestare të ekipeve në terren, zjarri ka shkatërruar tërësisht katin e parë të shtëpisë dhe ka përfshirë edhe një pjesë të katit të dytë.
Fatmirësisht, nga ky incident nuk ka persona të lënduar dhe as viktima, por dëmet materiale vlerësohen të jenë të mëdha.
Me rekomandim të Prokurorit kujdestar, rasti është iniciuar si “Shkaktim i rrezikut të përgjithshëm”, ndërsa në vendin e ngjarjes pritet të kryejë ekzaminime edhe eksperti i zjarrit, i cili do të ndihmojë në përcaktimin e shkakut të shpërthimit të flakëve.
Hetimet janë në vazhdim.
