Gazeta Sinjali në vazhdimësi ka raportuar për arrestimin e personave të dënuar nga Gjykatat në vend për vepra të ndryshme penale, por që të cilët arrijnë të ikin nga duart e drejtësisë. Vetëm gjatë ditës së sotme kanë rënë në pranga të Policisë disa të kërkuar me urdhëresa të Gjykatave.
Sinjali mëson se vetëm gjatë ditës së sotme në rajonin e Mitrovicës janë arrestuar disa persona të cilët po i iknin dënimeve me burg.
Një 51-vjeçar është arrestuar sot në pikën e kalimit kufitar në Bërnjak, pasi i njëjti gjatë verifikimit ka rezultuar se është i kërkuar me urdhëresë të Gjykatës Themelore në Mitrovicë. Ai më pas është transportuar në Mitrovicë për procedura të mëtutjeshme.
Dënimit me burg po i ikte edhe një tjetër person në Mitrovicë, i cili është arrestuar mëngjesin e sotëm në shtëpinë e tij në rrugën ‘Esat Imeri’. 45-vjeçari pas arrestimit ka paguar gjobën dhe më pas është liruar.
Pak minuta më vonë, në të njëjtën rrugë është arrestuar edhe një person tjetër që po kërkohej për të vuajtur dënimin e shqiptuar nga Gjykata Themelore në Mitrovicë. Pas arrestimit, 49-vjeçari ka paguar gjobën dhe më pas është liruar.
Ndërkohë në fshatin Shupkovc është arrestuar një person i dënuar për shitblerje të narkotikëve. Pas arrestimit, 42-vjeçari është dërguar në vuajtje të dënimit në Qendrën Korrektuese në Dubravë.
Për të njëjtën vepër është dërguar në vuajtje të dënimit në Qendrën e Paraburgimit edhe një 40-vjeçar. Ai u arrestua mëngjesin e sotëm në “Rruga e Ulqinit” në Mitrovicë.
Po ashtu është arrestuar edhe një i ri në rrugën “300 dëshmorët e 1903” në Mitrovicë, pasi ishte dënuar nga Gjykata për posedim të paautorizuar të narkotikëve. Pas arrestimit, ai është dërguar në Qendrën Korrektuese në Dubravë.
