Vlera e koeficientit në Ligjin e Pagave do të jetë 105 euro, është bërë e ditur në mbledhjen e Qeverisë të mërkurën. Ligji që hyn në fuqi pas pak ditësh rregullon çështjen e pagave për mbi 82 mijë punëtorët e sektorit publik.
Për të llogaritur pagën duhet shumëzuar vlerën e koeficientit me koeficientin. Pra pasi që vlera e koeficientit është 105 euro, zyrtari që ka pagë në koeficient 5 do të marrë pagë 525 euro bazë, pa llogaritur shtesat.
Në Ligjin për Paga janë 136 nivele të koeficienteve, me raport prej 2 në 18. Paga më e lartë do të jetë ajo e presidentit me koeficientin 18, apo 1890 euro.
Kryetari e Gjykatës Kushtetuese do të ketë koeficient 17.5 ndërsa 17 do të jetë koeficienti për postin e kryeparlamentarit dhe kryeministrit. Deputeti dhe ministri do të kenë pagë të barabartë, me koeficient 16.4.
Sa i përket kryetarëve të komunave, ai i kryeqytetit do të ketë pagë me koeficient 15, ndërsa pagat e të tjerëve do të dallojnë varësisht prej numrit të qytetarëve që kanë ato komuna.
Në gjyqësor, që ka paralajmëruar dërgimin e Ligjit në Gjykatën Kushtetuese, paga për kryetarin e Gjykatës Supreme do të jetë në koeficientin 17. Koeficienti te gjyqtarët do të sillet prej 15.5 deri në 12 për gjyqtarin e Themelores dhe të dhomës së shkallës së parë të Komerciales. Në Prokurori, paga e kryeprokurorit do të jetë me koeficientin 17, ndërsa prokurorët e përgjithshëm në Themelore do të kenë pagë me koeficient 12.
Në Ushtri, komandanti do të ketë koeficientin 15, ndërsa paga më e ulët do të jetë për rekrutin/kadetin e FSK-së me koeficient 2, që është edhe paga më e ulët në vend.
Në Polici, drejtori i përgjithshëm do të ketë pagë me koeficient 14.5, ndërsa polici i thjeshtë koeficient 5. Kadeti policor do të ketë koeficientin 2.
Te zjarrfikësit koeficienti do të sillet nga 4 deri në 8.
Në arsim, pagat e mësimdhënësve do të sillen prej koeficientit 5.6 për ata të shkollave fillore dhe të mesme të ulëta deri në 5.8 për mësimdhënës të shkollave të mesme të larta.
Në shëndetësi, pagat e mjekëve do të jenë nga 7.4 për mjekët e përgjithshëm në 12 për specialistët.
Ligji parasheh kompensim për kujdestari, për punën gjatë natës e për punë jashtë orarit. Ndërsa ulja e nivelit të pagës parashihet vetëm në dy raste, të tronditjes makroekonomike a të fatkeqësisë natyrore.
Vlera monetare e koeficientit përcaktohet me ligjin vjetor të buxhetit, që sivjet është rritur edhe për paga e shtesa për 75 milionë euro në raport me vitin e shkuar.
Këto janë koeficientet për të gjithë punëtorët e sektorit publik
Disa prej pagave në sektorin publik:
Presidenti 1890 euro
Kryetari i Gjykatës Kushtetuese 1837.5
Kryetari i Kuvendit 1785 euro
Kryeministri 1785 euro
Deputet 1722 euro
Ministër 1722 euro
Zëvendësministër 1554 euro
Kryetari i kryeqytetit 1575 euro
Kryetari i komunës me mbi 100 mijë qytetarë 1365 euro
Kryetari i komunave deri 10 mijë qytetarë 1239 euro
Kryetari i Gjykatës Supreme 1785
Kryesuesi i Këshillit Gjyqësor i Kosovës 1732.5 euro
Gjyqtar i Themelores nga 1260 deri në 1396.5 euro
Kryeprokurori 1785 euro
Kryesuesi i Këshillit Prokurorial 1732.5
Prokuror nga 1344 deri në 1260
Komandanti i FSK-së 1575
Ushtar 588
Rekruti 210
Drejtori i policisë 1522.5
Polici 525
Polic i ri 472.5
Kadet 210
Komandanti i brigadës së zjarrfikësve 735
Zjarrfikës 525
Zjarrfikës praktikant 420
Drejtori i doganës 1522.5
Zyrtar doganor nga 987 në 682.5
Rektori 1491 euro
Dekani 1344 euro
Profesori i rregullt 1302 euro
Drejtor i Shkollës së Mesme të Lartë 661.5 euro
Drejtori i shkollës fillore dhe të mesme të ulët 651 euro
Mësimdhënësit në shkollë të mesme të lartë 609 euro
Mësimdhënësit në fillore dhe të mesme të ulët 588 euro
Edukator 535.5 euro
Drejtori i SHSKUK-së 1470 euro
Mjek specialist 1260 euro
Mjek i përgjithshëm 777 euro
Kryeinfermier 672 euro
Infermierët nga 588 deri në 535.5
Ligji parasheh kompensim për kujdestari, për punën gjatë natës e për punë jashtë orarit. Ndërsa ulja e nivelit të pagës parashihet vetëm në dy raste, të tronditjes makroekonomike a të fatkeqësisë natyrore.
Vlera monetare e koeficientit përcaktohet me ligjin vjetor të buxhetit, që sivjet është rritur edhe për paga e shtesa për 75 milionë euro në raport me vitin e shkuar.
Të mërkurën Qeveria ka miratuar ndryshimet në Ligjin për Buxhetin, që do të shkojnë për miratim në Kuvend. Pagat e reja do të dalin nga ky muaj, ka thënë kryeministri Albin Kurti. Ai ka paralajmëruar se vitin e ardhshëm vlera e koeficientit do të jetë 110.
