Qeveria e Kosovës në mbledhjen e ditës së sotme ka zgjedhur Bordin e ri të Drejtorëve të Kompanisë Rajonale të Ujësjellësit “Mitrovica”, raporton Gazeta Online Veriu.info.
Anëtarët e këtij bordi do të kenë mandat 3 vjeçar.
Në krye të bordit të KRU “Mitrovica” është përzgjedhur Kumrije Kelmendi – Aliu, kurse anëtarë: Zijadin Lutolli, Bashkim Halabaku dhe Miranda Zherka.
Dy nga anëtarët e zgjedhur të bordit nuk figurojnë në listën e publikuar ditë më parë të kandidatëve që kanë hyrë në listën e ngushtë pëe intervistë me gojë.
Kumrije Kelmendi Aliu dhe Zijadin Lutolli nuk janë pjesë e kësaj liste, dhe që të dy kanë qenë pjesë e bordit të përkohshëm të kësaj ndërmarrje kur zgjodhën kundërligjshëm kryeshefin e kësaj ndërmarrje, Bashkim Kurtin.
Veriu.info pati raportuar ekskluzivisht për këtë proces që ishte shpallur si i kundërligjshëm nga Inspektorati i Punës dhe kërkohej anulimi i zgjedhjes së kryeshefit të KRU “Mitrovica”.
Pasi bordi nuk kishte zbatuar vendimin e inspektoratit, ky i fundit kishte dënuar anëtarët e bordit të përkohshëm, në mesin e tyre edhe Kumrije Kelmendi Aliun dhe Zijadin Lutollin që sot janë zgjedhur anëtar të bordit me mandat tre vjeçar.
Si duket vendimet e kundërligjshme gjatë kohës sa ishin anëtarë të bordit të përkohshëm, nuk kanë penguar qeverinë që t’i zgjedh sërish në këtë pozitë kryesuesen Kelmendi Aliu dhe anëtarin Lutolli.
Ditë më parë Veriu.info ka dërguar pyetje në adresë të kryeministrisë dhe ministrisë lidhur me rastin e kryesueses Kelmendi Aliu e cila nuk ishte përfshirë në listën e ngushtë për intervistë me gojë por pas ankesës u fut në listë e madje u zgjodh kryesuese e bordit të KRU “Mitrovica”.
Por asnjë nga institucionet e lartcekura nuk kanë kthyer përgjigje./Veriu.info/
