Shtetet e QUINT-it kanë dalë me një reagim pas dorëheqjes së anëtarëve të Listës Serbe dhe Iniciativës Qytetare për Liri, Drejtësi dhe Mbijetesë nga komisionet komunale zgjedhore në veri të vendit, duke bërë thirrje që këto vendime të rishqyrtohen, raporton Gazeta Sinjali.
Në reagimin e tyre thuhet se qeverisja në veri do të kthehet kur në zgjedhje ka pjesëmarrje aktive të të gjitha komuniteteve.
Po ashtu, QUINT-i i ka bërë thirrje edhe Qeverisë që të jetë e përgjegjshme ndaj shqetësimeve të qytetarëve të saj dhe të veprojë me profesionalizëm gjatë procesit.
“Na vjen keq për deklaratat e Listës Serbe dhe akterëve të tjerë politikë serbë të Kosovës që bëjnë thirrje për tërheqje nga pjesëmarrja në këtë votim. Pjesëmarrja demokratike është thelbësore për të siguruar që institucionet e zgjedhura të jenë përfaqësuese të qytetarëve të cilave u shërbejnë.
Ne e pranojmë se zgjedhjet e 23 prillit 2023 nuk dhanë zgjidhje politike afatgjatë për këto komuna dhe se qeverisja përfaqësuese në veri do të rikthehet kur të mbahen zgjedhjet për kryetarë komunash me pjesëmarrjen aktive të të gjitha komuniteteve. Mirëpo, bojkotimi i votimit të 21 prillit nuk do të sjellë këtë rezultat dhe as nuk do të sjellë ndonjë përfitim për qytetarët që jetojnë në veri.
https://www.facebook.com/EuropeanUnionInKosovo?fref=nf&ref=embed_post
Ndryshe, Lista Serbe kishte iniciuar largimin e serbëve nga institucionet e Kosovës në nëntor të vitit 2022 dhe më pas kishte bërë thirrje për bojkotimin e zgjedhjeve të prillit të vitit të kaluar.
Mirëpo, në mesin e tetorit të vitit 2023, ajo deklaroi se ishte e gatshme të merrte pjesë në zgjedhjet në komunat në veri, pa vendosur asnjë kusht për pjesëmarrje në zgjedhje, siç kishte bërë më herët.
