Policia e Kosovës ka arrestuar një burrë nga Obiliqi dhe një grua nga Mitrovica, pasi dyshohet se në këmbim të parave, para disa muajsh kanë lejuar bashkëjetesën e fëmijëve të tyre, të cilët janë nën moshën 16-vjeçare. Prokuroria u vu në dijeni për këtë rast pasi marrëveshja mes dy të dyshuarve për pagesë u prish. Sinjali ka mësuar se si ka ndodhur ngjarja që nga fillimi dhe ju sjellë detaje.
Burimet e Sinjalit brenda Prokurorisë kanë bërë me dije se gjithçka nisi para gjashtë muajsh, kur i dyshuari F.B., dhe e dyshuara R.H., lidhën marrëveshje me pagesë, në mënyrë që fëmijët e tyre të mitur të jetojnë bashkë.
Gjatë kësaj kohe, dy familjet nuk arritën që ta mbajnë marrëveshjen siç kishin premtuar dhe u prishën. Kësisoj, babai i vajzës vendosi ta denoncojë rastin në Polici, ku fillimisht ka deklaruar se vajza e tij është larguar nga shtëpia dhe ka shkuar në Mitrovicë.
Për t’i zbardhur rrethanat e ngjarjes, Policia ka intervistuar dy palët e përfshira, me ç’rast babai i vajzës ka thënë se meqë me familjen e djalit me të cilin po bashkëjeton vajza nuk kanë arritur të merren vesh, ka kërkuar ndihmë nga Policia.
Përveç tij, deklaratë në Polici ka dhënë edhe nëna e të miturit dhe më pas ndaj të dy të dyshuarve, Prokurori i Shtetit ka urdhëruar inicimin e rastit, kurse vajza është kthyer në shtëpi.
