Sot në mëngjes në shumë shkolla fillore serbe në Kosovë kanë arritur lajmërime për bomba.
Siç merr vesh portali në gjuhën serbe “Kosovo Online”, lajmërimet për bomba kanë arritur mëngjesin e sotëm në shkollat fillore në Leposaviq, Zubin Potok, Mitrovicë Veriore, Graçanicë dhe Gushtericë të Poshtme.
Nxënësit e këtyre shkollave fillore sot në mëngjes janë liruar në shtëpi, ndërsa mësimet do të organizohen online gjatë ditës.
Mëngjesin e sotëm shkollat kanë marrë një e-mail kërcënues ku me alfabetin çirilik pretendohet se “në shkollë është vendosur një mjet shpërthyes”, si dhe se “vrasjet do të ndodhin, ne do të vrasim. Shkatërrimi është i nevojshëm. Do të shkatërrojmë. Sinqerisht na vjen keq që do të pësojnë të pafajshmit. Nuk ka mënyrë tjetër. Do të rrënojmë qeverinë e Serbisë. Sytë tanë janë drejtuar kah presidenti i Serbisë dhe përcjellja e tij. Do të vrasim të gjithë”.
