Gjatë tërë ditës Telekomi është përballur me sulme kibernetike. Këtë e ka konfirmuar për Portalin Dukagjini, drejtori teknik në Telekom, Halil Krasniqi.Krasniqi ka bërë të ditur se janë në dijeni për llojin e këtij sulmi, por këtë nuk mund ta tregojnë për publikun për arsye të sigurisë.Ndërkaq, ai po ashtu, njoftoi se Telekomi i Kosovës, ka pasur mjaft probleme për të operuar normalisht gjatë ditës së martë për shkak të këtyre sulmeve.
Ai theksoi se sulmi tashmë është ndalur, por që janë duke punuar ende në rrjet për shkak të ngarkesave të shumta që ka shkaktuar sulmi në fjalë.“Po sulmi kibernetik është që nga mëngjesi, po merremi me atë punë intesivisht. Tash sulmin e kemi ndalë por na ka lënë disa ngarkesa brenda në rrjet kështu që po merremi edhe me atë punë që shpejt t’i kthehemi shërbimeve. Kemi pasur probleme gjatë gjithë ditës që nga ora 8 e mëngjesit, jo vazhdimisht por pjesën më të madhe të kohës sidomos në shërbimet e internetit sidomos në mobil. Po dihet se çfarë sulmi është por nuk preferohet të publikohet meqenëse po merremi me atë”, ka thënë ai.
