Presidenti i Serbisë, Aleksandër Vuçiq, ka thënë se është prishur marrëveshja e Washingtonit pasi Kosova dorëzoi zyrtarisht kërkesën për anëtarësim në Këshillin e Evropës.
Disa minuta pasi Qeveria e miratoi në parim nismën për anëtarësim, Vuçiqi iu drejtua mediave duke iu thënë se “e prishën” marrëveshjen, referuar Kosovës.
“Ata e shkelën dhe e nëpërkëmbën brutalisht, nuk shqetësohen asgjë. Pas dhjetë vjetëve nëpërkëmbje të Marrëveshjes së Brukselit tash kanë shkelur Marrëveshjen e Washingtonit, ndërsa Rezolutën 1244 se respektuan kurrë”, ka thënë Vuçiq në hapjen e panairit të makinave, raporton B92. “Ne na takon të mos futemi në urrejtje, por të japim një përgjigje të fortë dhe në përputhje me rrethanat kam caktuar një seancë të Këshillit të Sigurisë Kombëtare”.
Ai ka shtuar se Serbia do të tregojë në ditët në vijim se mund të luftojë.
“Është e qartë se vendet kryesore perëndimore po e udhëheqin këtë lojë, ne jemi vend i vogël i lirë që mbron sovranitetin e vet, do të përpiqemi të kundërshtojmë ato në mënyrë paqësore dhe diplomatike”, shtoi presidenti serb.
Vuçiq ka thënë se është detyrë e tij ta mbrojë Serbinë.
Ai ka thënë se Kosova ka 67 deri 70 për qind të mbështetjes në Këshillin e Evropës, nëse votohet për anëtarësim. Ndërsa ka shtuar se Kosova nuk do të ndalet vetëm me kërkesën për anëtarësim në Këshill të Evropës.
“E ashtuquajtura Kosovë ka mbështetjen e SHBA-së për anëtarësim në Partneritetin për Paqe, e gjithë kjo nuk i vlen shumë nëse nuk e ka dritën jeshile nga Serbia. Me këtë na treguan të gjithë ata që na folën për respektim të së drejtës ndërkombëtare, se nuk respektojnë asnjë vlerë e parim”, tha Vuçiq.
Ai ka shtuar se kjo do të ketë probleme shtesë në rajon.
“Kjo do të ketë efekte shtesë në marrëdhëniet në nevojë. Përgjigja jonë duhet të jetë e zgjuar dhe e mençur, për të ruajtur stabilitetin”, tha Vuçiq.
Ai ka thënë se nuk pret asnjë reagim nga Perëndimi në lidhje me lëvizjen e Kosovës për anëtarësim në Këshill të Evropës.
“Ata janë shumë më të fortë, nuk e kam fjalën për Prishtinën, por për mësuesit e saj, ata që i kanë lindur dhe i kanë përkundur dhe që i mbajnë sot. Vendet kryesore perëndimore po e udhëheqin këtë lojë. Ne jemi vend i vogël dhe i lirë dhe do të përpiqemi të kundërpërgjigjemi në mënyrë të qetë e diplomatike. Fuqitë tona janë të vogla por jeta është luftë. Nuk ka tërheqje dhe dorëzim para shantazheve e ultimatumeve”, tha Vuçiq.
Vuçiq ka ftuar seancën e Këshillit të Sigurimit Nacional të premten në ora 11:00.
“Unë pyes pse na thirrën në Washington, kur në rastin e parë e shkelën marrëveshjen e Washingtonit. Ata duan që ne ta njohim pavarësinë e Kosovës, por ne s’do ta bëjmë këtë”, tha Vuçiq.
Anëtari i partisë së tij SNS, Vladimir Gjukanoviq, të enjten tha se e sheh reale mundësinë e anëtarësimit të Kosovës në Këshill të Evropës.
