Presidenti i Serbisë, Aleksandar Vuçiq, deklaroi se ka biseduar për disa orë sot në Beograd me përfaqësuesit e serbëve të Kosovës, për të diskutuar çështjen e mbajtjes së zgjedhjeve të 3 prillit të shtetit serb në Kosovë.Në një konferencë për media, ai tha se për lejimin e mbajtjes së këtyre zgjedhjeve në Kosovë, Prishtina ka kërkuar nga Serbia që fjalë për fjalë dhe De fakto ta njohë pavarësinë e Kosovës.“Serbia nuk do ta njohë pavarësinë e Kosovës.
Ata kanë insistuar vetëm në një gjë, pra që ne ta njohim pavarësinë e Kosovës. Serbia nuk e ka pranuar këtë dhe nuk do ta pranojë. Për këtë nuk e kemi pranuar”, tha Vuçiq para gazetarëve.I pari i shtetit serb po ashtu theksoi se kjo që po bën Prishtina është shkelje e të drejtave të njeriut, dhe kërkoi nga serbët e Kosovës që të jenë të duruar dhe të numërojnë deri në 10, duke shtuar se është befasuar nga gatishmëria e tyre për sakrifikim.“Nuk e kam ditur që njerëzit janë të gatshëm të sakrifikojnë gjithçka që kanë në Kosovë, madje edhe për t’u larguar nga atje. Unë i kam lutur që të qëndrojnë në Kosovë. I kam siguruar që shteti ynë do të jetë me ta dhe që qeveria serbe po i lut për pak mirëkuptim dhe që të mund të llogarisim se çka është ajo që po na bëhet”.“Ata kanë kërkuar që t’i kundërvihen të gjitha institucioneve në Kosovë, që policet t’i lëshojnë armët në Veri të Kosovës dhe ta lënë policinë. Kanë kërkuar t’i lëshojnë të gjitha institucionet për shkak të terrorit që po kalojnë në atë vend”.“Unë i kam pyetur: ‘Ok nëse e bëjmë këtë, çka pas?”. Ditën më pas po frikësohem që do të mund të hynim në një rrugë pa krye, pra iu kam lutur për durim dhe që t’i vazhdojmë këto bisedime më 8-9 prill”.
Mes tjerash Vuçiq deklaroi se për zgjedhjet e 3 prillit do të përgatiten vendvotime të veçanta në komunat fqinje në Serbinë qendrore, ku do të mund të votojnë qytetarët nga Kosova dhe se shpreson që Quinti do ta dënojë sjelljen e Prishtinës, dhe po ashtu që Serbia nuk guxon të bie në kurth, që sipas tij, po mundohen ta vënë.
Ndërkaq, nënkryetari i Listës Sebe, Dalibor Jevtiq, tha se do të organizojnë protesta të qeta me porosinë e qartë që “nuk duam që askush të na i mohojë të drejtat tona njerëzore”, dhe se do t’i vazhdojnë bisedimet me Vuçiqin.“Ajo që më së paku na duhet në këtë moment është ndonjë trazirë apo incident”, përfundoi ai.
