Faturat e rrymës po kalkulohen me të shtrenjtën, me gjithë aktvendimin e Gjykatës Themelore në Prishtinë për pezullimin e vendimit të Zyrës së Rregullatorit për Energji mbi zbatimin e tarifave të reja.
Këtë për KOHËN e kanë konfirmuar përfaqësues të KEDS-it, pas pyetjeve të adresuara rreth mbajtjes apo jo të ndonjë takimi me zyrtarët e ZRRE-së për kthimin e faturimit të energjisë elektrike me tarifat e vjetra, pas aktvendimit gjyqësor.
“KEDS-i është duke i aplikuar tarifat e energjisë elektrike që kanë hyrë në fuqi më 9 shkurt, në bazë të vendimit të ZRRE-së, si organ vendimmarrës dhe rregullator. E dini se KEDS-i është kompani ekzekutive dhe nuk ka kompetenca vendimmarrëse sa u përket tarifave. Për çdo hollësi tjetër ju lutem drejtojuni ZRRE-së”, ka thënë Viktor Buzhala, zëdhënës i KEDS-it.
Moszmbrapsjen nga vendimi mbi tarifa të reja, zyrtarët në ZRRE e kanë arsyetuar me interpretimin se aktvendimi i shkallës së parë nuk bëhet i ekzekutueshëm.
Kundër aktvendimit, ZRRE-ja është duke e përgatitur një ankesë të cilën do ta deponojë në Gjykatën e Apelit.
“Përderisa kjo çështje, pas ankesës së ZRRE-së, do të shqyrtohet nga Gjykata e Apelit, aktvendimi i shkallës së parë nuk bëhet i formës së prerë dhe praktikisht nuk është i plotfuqishëm dhe i ekzekutueshëm. Kjo është e definuar me nenin 66 të Ligjit për konfliktet administrative, ku përcaktohet se: ‘Vendimet e gjykatës mund të ekzekutohet atëherë kur bëhen të plotfuqishme dhe të ekzekutueshme’. Në këtë kuptim, besojmë se ky vendim bëhet i plotfuqishëm dhe i ekzekutueshëm atëherë kur vendoset në shkallën e dytë, dhe deri në vendimin e shkallës së dytë akti i kontestuar, përkatësisht Vendimi i Tarifave mbetet në fuqi”, thuhet në përgjigjen e Zyrës s Rregullatorit për Energji.
Yll Zekaj nga Instituti i Kosovës për Drejtësi thotë se ZRRE-ja nuk po i interpreton drejt ligjet, pasi që vendimi i Themelores është për masë të përkohshme dhe rrjedhimisht bëhet automatikisht i ekzekutueshëm.
“Prej momentit që është marrë ai vendim në Gjykatën Themelore në Prishtinë, vendimi i ZRRE-së është i pezulluar. Është i pezulluar, është i ngrirë dhe nuk mund të krijojë efekt juridik, pavarësisht ankesës që mund të bëhet kundrejt këtij vendimi të Gjykatës Themelore në Apel”, ka thënë Zekaj.
“Nëse Bordi ka përgjegjësi për zbatimin e vendimeve dhe nuk e bën një gjë të tillë, atëherë pjesë e sferës penale është pikërisht Bordi”.
Abelard Tahiri ka thënë për KOHËN se Partia Demokratike e Kosovës është duke mbledhur prova dhe se deri në fund të javës do të dorëzojë kallëzim penal ndaj Bordit të ZRRE-së për mosrespektimin e vendimit të Gjykatës.
Bazuar në nenin 394 të Kodit Penal, për mosekzekutimin e vendimeve gjyqësore, personi përgjegjës mund të dënohet me gjobë apo me burgim deri në dy vjet.
Në rast se me këtë vepër penale shkaktohet shkelje e rëndë e të drejtave të njeriut apo dëm substancial material, atëherë neni e parasheh për kryesin dënimin me burgim, duke nisur prej gjashtë muaj e deri në pesë vjet.
