Përmes një postimi në rrjetin social Facebook, Abdixhiku ka thënë se ky është një lajm i keq për të gjithë shqiptarët.
Sipas tij, Kosova po vazhdon të rrugëtojë drejt izolimit dhe vetmisë, kësaj here edhe pa Shqipërinë.
“Kosova fatkeqësisht vazhdon të rrugëtoj drejt izolimit e vetmisë. Këtë herë, si asnjëherë, mbetëm dhe pa Shqipërinë. Po mbesim dhe do të mbesim pa secilin aleat që qëndronte me ne në çdo etapë të vështirë”, shkroi ai.
Tutje i pari i LDK-së tha se rrugëtimi i kryeministrit, Albin Kurti, rrezikon shtetësinë e Kosovës.Ndryshe, ishte kryeministri shqiptar, Edi Rama, ai i cili përmes një konference të jashtëzakonshme për media konfirmoi se mbledhja e përbashkët që ishte paraparë të mbahej nesër në qytetin e Gjakovës, është anuluar.
Rama në këtë konferencë shpalosi detaje të frikshme për fatin e Kosovës, duke thënë se bashkësisë ndërkombëtare po i soset durimi dhe të njëjtit janë në prag të sanksioneve për Kosovën.
Ai madje shtoi se besimi dhe mbështetja e ndërkombëtarëve për Kosovën nuk do të jetë siç ka qenë deri më tani dhe se efekti destabilizues i marrëdhënieve në mes bashkësisë euroatlantike dhe Kosovës nuk do të jetë edhe aq i përkohshëm.
Në anën tjetër, Qeveria e Kosovës përmes një reagimi publik ka bërë me dije se mbledhja është anuluar njëanshëm, duke lënë të kuptohet se kryeministri Rama nuk është konsultuar me kryeministrin Kurti për një gjë të tillë.
E gjithë kjo situatë është përcjellë me shumë reagime nga partitë opozitare dhe pjesëtarët e shoqërisë civile.
