Ahmet Tahiri, avokati i i ish-drejtorit të Kadastrit në Mitrovicë, Hysen Muzliukaj është ankuar se ministri i Bujqësisë, Faton Peci e ka liruar nga detyra klienti e tij, shkruan Insajderi.
Ai ka thënë se “nuk ekziston as dyshimi i bazuar mirë se i njëjti ka kryer veprën penale për të cilën është ndaluar“.
Mes tjerash avokati ka akuzuar Pecin, se po vepron me standarde të dyfishta.
“Një vendim i tillë i padrejtë ndërmerret kur në detyrë mbesin një numër i konsideruar i ministrave me aktakuza të konfirmuara! Kjo flet për standardet e dyfishta. Ndërmerren masa ndaj njerëzve që lirohen me vendim të gjykatës, ndërsa mbesin në pozita ata që kanë aktakuza”, ka shkruar ai.
Tutje avokati shkruan se “Klientit tim me këtë vendim i është shkaktuar dëm i pariparueshëm material dhe moral që në fund do faturohet buxhetit të shtetit”.
Ditë më parë, Hysen Muzliukaj u lirua nga paraburgimi. Ai u arrestua me vendim të Prokurorisë Speciale nën dyshimin për korrupsion dhe keqpërdorim të detyrës zyrtare, shkruan Insajderi.
Prokuroria Speciale njoftonte se Hysen Muzliukaj me dashje ka shfrytëzuar detyrën apo autoritetin zyrtar me qëllim të përfitimit të dobisë së kundërligjshme pasurore për vete apo për tjetrin, ka tejkaluar kompetencat e tij zyrtare dhe nuk i ka respektuar detyrat dhe përgjegjësinë e që të ushtrojnë funksionin e tij në bazë të ligjit.
