Ka përfunduar protesta e serbëve në Rudarë, e cila filloi në orën 12:00.
Gjatë kësaj proteste, në disa pankarta shkruhej “Rohde kjo nuk është Gjermania juaj, kjo është Serbi”.
Po ashtu, përveç një flamuri të gjatë serb që u shpalos në protestë pati edhe pankarta të tjera të tilla: “Me besim në Zot për Krishtlindje”, “President Vuçiq, ne kemi besim te ti”, “Sepse nuk ka kthim nga këtu”, “Drejtësi për Dejanin, Miljanin dhe Slladanin”, ndërsa pankarta e një madhësie më të madhe ishte kundër kryeministrit Kurti.
Përveç kryetarit të Listës serbe, Goran Rakiç, kanë folur edhe kryetari i komunës së Shtërpcës, Dallibor Jevtiq, kryetari i Komunës së Zveçanit, Dragisha Milloviq, ish kryetari i Gjykatës Themelore në Mitrovicë, Nikolla Kabashiq etj.
Protestuesve iu është drejtuar Predrag Pantiq, djali i policit të arrestuar Dejan Pantiq, i cili tha se babai i tij u arrestua vetëm pse është serb.
Ata kërkuan lirimin e të arrestuarve Dejan Pantiq dhe të tjerët, pastaj tërheqjen e forcave policore nga veriu, si dhe anulimin e listës së arrestimeve me të dyshuar serbë.
