E kanë festë të krenarisë kombëtare ani se humbën.
Kësisoj, edhe në 28 qershorin e këtij viti, serbët u mblodhën në Gazimestan për ta kujtuar Betejën e Kosovës, por edhe për ta përsëritur refrenin se “Kosova është djepi i Serbisë”.
Kësaj radhe, aty u pa edhe politikani radikal Nemanja Sharoviq, që për vite të tëra ishte krahu i djathtë i Sheshelit, ndërsa tani i shndërruar në reporter.
Njeriu, që ka djegur disa herë publikisht flamurin e Republikës së Kosovës, nuk dihet se pse u lejua të hynte, por atë ditë po merrte deklarata nga të pranishmit.
Veçse njëri nga të intervistuarit, ishte Millan Vukashinoviq nga Leposaviqi që kishte pakënaqësi vetëm me drejtuesit e shtetit të Serbisë dhe të Listës Serbe.
“Edhe në këtë kohë ne nuk jemi të lirë , unë për vete nuk udhëtoj në Serbi për shkak të regjimit që është atje dhe gjithë ato që i kanë shpikur duke më lidhur me shqiptarët , prandaj nuk jam i sigurt të udhëtoj në Serbi. Jam vetëm në Kosovë, dhe e shmangu Serbinë. Unë as nuk tentoj të shkoj e pastaj të mbahem në kufi sepse çka mund të del nga kjo dicka më shumë. Derisa nuk ndryshon për të mirë”.
Ai tregonte se punon në pikëkalimin kufitar Jarinje mes Kosovës dhe Serbisë, dhe se me çfarë presioni po përballet nga Lista Serbe.
“Listën Serbe unë as se kam dëgjuar që ta lë punën, sepse ata as nuk më kanë punësuar , kështu që ata këtu janë saktë ashtu . Po kishte presion direkt nga ta , dhe kjo nuk është spontane. Dihet se kush dirigjon këtu dhe e bënë gjithë këtë. Lista Serbe janë ashtu siç i quajmë ne terroristë, kjo vlen te ne”.
Vukashinoviq, u bë lajm gjithandej kur Policia e Kosovës njoftoi se ka pranuar një informacion se në zonën e Leposaviqit, ai dyshohet se është plagosur dhe është rrëmbyer brenda territorit të Republikës së Kosovës, nga xhandarmëria serbe.
Vendi i ngjarjes ku raportohet se ka ndodhur rasti dyshohet se gjendet brenda territorit të Republikës së Kosovës, pra, brenda hapësirës (siç quhet pika zero -0-), në afërsi të zonës së Leposaviqit, në mes të Republikës së Kosovës dhe Serbisë, ku për këtë Policia e Kosovës ka njoftuar dhe ka bashkëpunuar me KFOR-in, si përgjegjëse për zonën/brezin kufitar”, njoftuan forcat e rendit mes tjerash, për rastin që ka ndodhur më 1 nëntor, njofton Klan Kosova.
Po, sipas atij njoftimi Drejtoria për Hetimin e Krimit të Organizuar dhe Krimeve të Rënda, ka ndërmarrë veprimet e saja hetimore, duke intervistuar dëshmitarë të rastit, përmes të cilëve janë siguruar informacione se disa persona të maskuar kishin hyrë në territorin e Republikës së Kosovës, duke e plagosur dhe rrëmbyer viktimën të cilët pastaj e kishin dërguar në territorin e Serbisë, ku sipas dëshmitarëve me një autoambulancë e kanë dërguar në drejtim të qytetit të Nishit në Serbi.
15 ditë nga incidenti autoritetet serbe kanë heshtur plotësisht për rastin që sipas autoriteteve ndodhi në pikë-kalimin e paregjistruar mes dy shteteve në Jellackë të Leposaviqit.
Preisidentja e Republikës së Kosovës, Vjosa Osmani, njoftoi të martën e kësaj jave se udhëheqësit të zyrës kosovare në Beograd, nuk I është lejuar të vizitojë shtetasin Vukashinoviq.
Ajo i bëri thirrje botës që të reagojë dhe të ndalë sulmet e Serbisë, që sipas shefes së shtetit kërcënojnë paqen dhe stabilitetin
Nga Prokuroria e Mitrovicës, kanë thënë për Klan Kosova, se hetimi intensiv për të zbardhur gjithë rastin në fjalë po vazhdojnë përderisa një person është marrë në pyetje dhe është identifikuar makina.
Ndërsa, misioni paqeruajtës i NATO-s në Kosovë, KFOR, i cili është përgjegjës për vijën kufitare , ka thënë se është në dijeni rreth njoftimit të Policisë së Kosovës se një serb i Kosovës dyshohet të jetë plagosur dhe rrëmbyer nga xhandarmëria e Serbisë brenda territorit të Kosovës, mirëpo situata e sigurisë në vijën kufitare administrative, siç e quajnë ata është e qetë.
“Policia e Kosovës ka nisur hetime dhe vazhdon të jetë në kontakt të ngushtë me disa entitete, përfshirë KFOR-in. Policia e Kosovës e ka koordinuar aktivitetin e vet në anën kosovare të vijës kufitare administrative me KFOR-in”, është thënë në përgjigjen e këtij misioni.
Ndërkohë avokati i familjes Vukashinoviq, Ivan Niniq, e akuzon direkt aparatin shtetëror në Serbi, se e plagosi dhe rrëmbeu burrin nga Leposaviqi, dhe tani në gjendje të rëndë e mban në Nish. Ai ka publikuar edhe fotografi të makinës që ai thotë se i përket klientit të tij e që, sipas tij, është goditur me 23 fishekë.
Niniq ka dorëzuar edhe kallëzim penal në Prokurorinë serbe ndaj kryeterroristit të Banjskës Millan Radojciq, dhe disa personave tjerë të pa identifikuar; pasi që pretendon se Vukashinoviq, ka histori të gjatë të konfliktit me ish-nën kryetarin e Listës Serbe, që ka gjetur strehë në Beograd.
Kurse mediat e afërta me pushtetin në Serbi, kanë dhënë informacione se policë e ushtarë të tyre u arrestuan para disa ditësh, nga BIA, pasi që pretendimet serbe janë që ata sikur edhe Vukashinoviq, kanë punuar për siç thuhet interesat e Kosovës.
