Skandal: Luljeta Zhubi punësoi djalin e dajës dhe gruan e tij në spitalin e Mitrovicës
Prishtinë – Drejtoresha e Spitalit “Dr. Sali Haxhibeqiri” në Mitrovicë, Luljeta Zhubi kishte punësuar djalin e dajës si depoist në spital dhe gruan e tij si infermiere.
Për punësimin e parë, Agjencia për Parandalimin e Korrupsionit (APK) ka gjetur se drejtoresha është në konflikt të interesit.
Sipas vendimit të APK-së të siguruar nga “Betimi për Drejtësi” thuhet se agjencia ka kërkuar nga Spitali Rajonal në Mitrovicë dhe Shërbimi Spitalor Klinik Universitar i Kosovës që të shfuqizohet apo të anulohet akti i nxjerrë për rrethana të konfliktit të interesit dhe pastaj të njoftojë agjencinë për vendimin final në lidhje me rastin.
Vitin e kaluar, K.J., ishte pranuar në pozitën depoistit në Spitalin e Përgjithshëm të Mitrovicës “Dr. Sami Haxhibeqiri” anipse ky spital udhëhiqej nga familjarja e tij, Luljeta Zhubi, kështu duke e kundërshtuar nenin 17, paragrafi 1 të Ligjit për Parandalim të Konfliktit të Interesit.
“Lidhur me konstatimin për shkelje si në pikën I. të dispozitivit, Agjencia për Parandalimin e Korrupsionit do të inicoj procedurën kundërvajtëse në gjykatën kompetente ndaj zyrtarës së lartë znj.Luljeta Zhubi”, thuhet në vendimin e APK-së i marrë më 24 tetor 2023.
Tutje, në vendimin e APK-së gjithashtu bëhet e ditur se në gusht të vitit të kaluar në pozitën infermiere e përgjithshme me shkollim “Bachelor”, në spitalin e Mitrovicës është pranuar A.M e cila është gruaja e K.J., djalit të dajës së drejtoreshës së spitalit, por sipas agjencisë në këtë rast nuk përbën konflikt interesi pasi që lidhja familjare e drejtoreshën Zhubi, dhe A.M është e largët.
“Raporti ndërmjet zyrtares së lartë znj.Luljeta Zhubi dhe A.M., që pretendohet të jetë gruaja e djalit të dajës së zyrtares në fjalë, sipas dispozitave të LPKI-së nuk konsiderohet raport që hyn në mesin e personave të afërm të saj”, thuhet poashtu në vendimin e APK-së.
Në takimin e mbajtur me agjencinë, sipas vendimit, Zhubi ka thënë se komisioni përzgjedhës për pozitën deposit e ka formuar drejtori mjekësor i spitalit pasi që drejtoresha ka qenë në pushim.
Por, për gjithë këtë situatë, drejtoresha Zhubi është arsyetuar se nuk ka qenë në dijeni se një çështje e tillë është konflikt interesi.
“Znj. Luljeta Zhubi e ka pranuar se kandidati (K.J) i pranuar në procesin e rekrutimit për pozitën depoist është djali i dajës së saj dhe se në këtë proces ajo në cilësi të Drejtoreshës Ekzekutive të Spitalit të Mitrovicës ka nënshkruar kontratën e marrëdhënies së punës. Por, që nuk ka qenë në dijeni se një çështje e tillë mund të paraqet konflikt interesi”, thuhet gjithashtu në arsyetimin e APK-së.
Në anën tjetër, Shërbimi Spitalor Klinik Universitar thotë se për këtë rast do të merren veprimet e nevojshme sipas ligjit.
“Kemi pranuar nga Agjencia Antikorrupsion një Vendim, ku është konstatuar konflikt interesi nga drejtoresha Zhubi. Konform Vendimit, drejtori i përgjithshëm ka kërkuar nga Sektori i personelit ShSKUK të ndërmarrë veprimet e nevojshme ligjore”, thuhet në përgjigjen e ShSKUK-së dhënë për “Betimi për Drejtësi”.
“Betimi për Drejtësi” ka dërguar pyetje tek drejtoreshën Luljeta Zhubi në lidhje me këtë rast por e njejta nuk ka kthyer përgjigje. /
