Valon Ahmeti ishte një nga boksierët shqiptarë që bëri krenar shqiptarët me performancën e tij në eventin “Audi Dome”.
Në këtë mbrëmje ku shkëlqyen shqiptarët pati duel edhe Haxhi Krasniqi.
Ahmeti ishte i pari që nisi këtë mbrëmjë të mrekullueshme për shqiptarët duke u ngjitur në ring ndaj kundërshtarit të tij, Mamuka Abduladze.
Boksieri shqiptar këtë meç e fitoi me KO duke e rrëzuar kundërshtarin në raundin e katërt.
Ahmeti ka folur për karrierën e tij dhe në veçanti u ndal për të folur pikërisht për këtë ndeshje ku ishin të pranishëm rreth 5500 spektatorë.
“Jam 26 vjeçar nga Mitrovica. Boksin e kam filluar në moshën 13 vjeçare në Mitrovicë, ku kam arritur të shpallem kampion 5 herë në pesë kategori të ndryshme në Kosovë(49kg, 52kg, 56kg, 60kg dhe 64kg). Poashtu kam qenë pjesëmarrës në Kampionatin Botëror për Kosovën ku është mbajtur në Sofie të Bullgarisë”, tha fillimisht Ahmeti duke folur për hapat e parë të karrierës së tij.
“Ndeshja më e mirë që e kam zhvilluar ka qenë pikërisht kjo e fundit ku në prani të 5500 spektatorëve kam arritur ta mposht një boksier me shumë përvojë. Gjeorgjiani në boksin amator ka qenë medalist i bronztë në Kampionatin Evropian, pra ka dal i 3’ti në Europë në vitin 2017“, shtoi ai.
“Mbrëmja e 25 shkurtit ishte një mbrëmje që nuk do ta harrojë asnjëherë. Të gjithë ata të pranishëm po brohorisnin emrin tim. Ishte një energji shtesë për mua, ku arrita edhe të triumfoi. Njëkohësisht dua të falenderoj Robin Krasniqin dhe Burim Hazrollin për këtë organizim fantastik. Gjithashtu falenderoj të gjithë ata që ishin të pranishëm në atë mbrëmje“, vazhdoi Ahmeti
Ahmeti tregoi edhe synimet e tij në karrierë ku tha se si synim e sheh pikërisht Robin Krasniqin.
“Synimet e mia sigurisht që janë ato të cilët kampioni i botës, Robin Krasniqi i ka arritur. Kam synim që edhe unë të fitoj titullin e Europës dhe të Botës dhe padyshim që me ndihmën e Zotit dhe ekipit tim profesional ‘RKBOXINGGYM’ sukseset nuk do të mungojnë“.
“Ndeshja ime e radhës do jetë me 27 maj në Gersthofen ku do të kemi ndeshje të gjithë ekipi, pra pos meje do ndeshen edhe Qendrimi, Kushtrimi, Isufi e James. Ju premtoj shumë suksesese në këtë rrugëtim dhe për çdo ndeshje do të mundohem që të përfaqësojë sa më mirë ngjyrat kuq e zi“, përfundoi Ahmeti./GazetaBlicSport/
