Përfaqësues të Fondit Monetar Ndërkombëtar, nëpërmjet një opinioni të publikuar në KOHA, e kanë kundërshtuar mundësinë e tërheqjes së një pjese tjetër të mjeteve nga Trusti. Sipas tyre, kjo do ta rëndonte rëndë sistemin pensional. Në linjë me këtë qëndrim është edhe partia në pushtet. Me gjithë përpjekjet e opozitës, në Lëvizjen Vetëvendosje kanë thënë se nuk do ta lejojnë prekjen e kursimeve të pleqërisë.
Fondi Monetar Ndërkombëtar po e kundërshton mundësinë e tërheqjes edhe të një pjese tjetër nga Fondi i Kursimeve Pensionale.
Në një opinion të publikuar në KOHA, përfaqësues të FMN-së kanë thënë se lejimi i tërheqjes së parakohshme të kursimeve do ta dëmtonte rëndë sistemin pensional.
“Qëllimi i kursimeve pensionale është të mbështesin standardin jetësor pas daljes në pension. Shfrytëzimi i këtyre kursimeve tani do ta dobësonte ndjeshëm fuqinë blerëse të të ardhurave të ardhshme të pensioneve, duke rritur mundësinë që ato të jenë të pamjaftueshme për t’i mbuluar edhe nevojat më bazike të konsumit. Në përgjithësi, ne mendojmë se kostot e lejimit të tërheqjeve të parakohshme nga llogaritë e TKPK-së janë më të mëdha se përfitimet, veçanërisht kur Qeveria ka miratuar masa të tjera mbështetëse për të menaxhuar ndikimin ngritjes së çmimeve”, kanë thënë ata.
Ata thonë se kanë kritikuar edhe tërheqjen e 10 përqindëshit më 2020, duke paralajmëruar se ajo do të krijonte precedentë me pasoja negative, çka sipas tyre, po ndodh tani.
“Lejimi i tërheqjeve të parakohshme vetëm sa do të rrisë madhësinë e shpenzimeve të ardhshme të Qeverisë. Kjo për shkak se mungesa e kursimeve private të pensioneve pas një kohe do të vejë presion mbi Qeverinë për të rritur pensionin bazë të financuar nga buxheti apo përfitimet e tjera. Nga ana tjetër, kjo do të rezultojë në më pak para për arsim, shëndetësi dhe infrastrukturë publike”, kanë deklaruar përfaqësues të FMN-së.
Tërheqjen e 10 deri në 30 për qind të Trustit, e ka propozuar Partia Demokratike e Kosovës.
Mbështetje propozimit të tyre për plotësim-ndryshim të Ligjit për Fonde Pensionale u kanë dhënë edhe grupet e tjera parlamentare opozitare.
Por pavarësisht mbështetjes së pjesës tjetër të opozitës, PDK-ja nuk i ka votat e mjaftueshme për ta kaluar këtë projektligj pa mazhorancën.
Aktualisht projektligji për plotësim-ndryshim të Ligjit për Fonde Pensionale është në Qeveri dhe për shqyrtimin e tij, ekzekutivi ka kohë edhe 5 ditë. Pas kësaj periudhe, projektligji do të futet automatikisht në procedurë parlamentare.
Por, edhe nëse ai shkon në Kuvend për miratim, në Lëvizjen Vetëvendosje kanë thënë se deputetët e pushtetit janë njëzëri kundër kësaj çështjeje.
Në një përgjigje për KOHËN, në partinë në pushtet kanë thënë se nuk do t’i prekin kursimet e pleqërisë.
“Po, qëndrimi i Lëvizjes VETËVENDOSJE! është i njëjtë me atë të vitit 2020 kur Qeveria antikushtetuese Hoti pati bërë të njëjtin veprim të paprecedentë duke prekur kursimet e qytetarëve dhe duke rrezikuar Trustin. Ne besojmë se shteti duhet t’i ndihmojë qytetarët nëpërmjet rishpërndarjes, nëpërmjet rritjes së punësimit, rritjes së mbështetjes për ata në skema sociale, fëmijëve, grave dhe të rinjve, si dhe fermerëve e ndërmarrësisë së vogël e të mesme. Si masë, tërheqja e 30% të Trustit nuk i ndihmon ata me të ardhura të vogla apo kategoritë në nevojë, pasi vetë përqindja e fondit pensional të tyre është e ulët. Dhe padyshim që këtë qëndrim e mendim e kanë të gjithë përfaqësuesit tanë kudo ku janë në institucione, sepse t’i fusësh duart te kursimet e pleqërisë së qytetarëve është një veprim që meriton të quhet i mangët nga cilësitë njerëzore”, thuhet në përgjigjen e VV-së.
Se kursimet pensionale nuk duhet të preken e thotë edhe ekonomisti Visar Vokrri.
Sipas tij, tërheqja e 30-përqindëshit nuk është në funksion të adresimit të problemit të inflacionit të lartë, të cilin e ka aktualisht Kosova, gjë e cila, si thotë Vokrri, mund të zgjidhet me politika fiskale.
“Nëse shohim edhe strukturën e kontributdhënësve dhe bilanceve të tyre, shohim se diku rreth 80 për qind e kontribuuesve kanë, le të themi, një të katërtën e të gjitha kontributeve. Me një masë të tillë, ne rrezikojmë që eventualisht një shtresë të madhe nga kontribuuesit t’i shndërrojmë në një barrë sociale për Qeverinë në të ardhmen”, ka thënë ai.
